Taza Kalaam taza-kalam

Hum Apna Aap LutaneGhazal
Hum apna aap lutane kaha’n pe aagaye hain
Khud apni qadrai’n ganawane kaha’n pe aagaye hain
Dilo’n se dil mile rehte the ghurbato’n main miya’n
Shikam ki aag bujahane kaha’n pe aagaye hain
Likha tha purkho’n ne sadio’n main jin ko mehnat se
Wo sare shajre jalane kaha’n pe aagaye hain
Jo chahte the rahe apni zaat tak ker baat
Wo apne zakhm dikhane kaha’n pe aagaye hain
Zamee’n pe apni hi jal bujh ke khak ho jate
Hum apne dil ko jalane kaha’n pe aagaye hain
Ye wo jagah hai jaha’n jism tak nahi chupte
Hum apne sir ko chupane kaha’n pe aagaye hain
Kisi bhi rishte ki izzat yaha’n nahi baqi
Miya’n ye aaj zamane kaha’n pe aagaye hain
Ye sach hai ehd-e-taraqqi kia tha khud se Adeel
Magar ye ehd nibhane kaha’n pe aagaye hain
Adeel Zaidi