Dara-e-gi bhala kia teri gardish Aasma'n mujh ko
Mila Rab se Dua-e-Fatima ka Saaeba'n mujh ko
Main shukr-e-Rab ka qaail hoon hawa kaisi bhi chalti ho
Pata aasaniyo'n ka de gai hain sakhtiya'n mujh ko
Ye hai qoul-e-Peghambar, Rab talak jana agar chaho
Dua maqbool ho jaae jo laao darmiya'n mujh ko
Libaas-e-Atlus-o-kamkhwab ki kia haisiyat hogi
Agar mil jaae'n damaan-e-Nabi ki dhajiya'n mujh ko
Yaqee'n hai is liye sar ko jhukaata hoo'n main sajde main
Ubhaare'n gi bulandi ki taraf yeh pastiy'an mujh ko
Kal meri souch main ye aaj ka suraj tu na tha
Aj nikla hai ye suraj tu main is souch main hoon
Ye naya din
Ye nai subh
Ye meri aankh ka phir se khulna
Kia kahin is ka badal or koi cheez bhi hai
Jab bhi suraj ye nikalta hai tu insaan numa
Kuch darinday
Kisi anjan ta'aqqub main nikal jate hain
Or phir panjon pe ye raingti bari makhlooq
Chhoti makhlooq ko zinda he nigal jati hai
Roz he zulm ki tareekh likhi jati hai
Matti or roti ki soondhi si mehek ke badlay
Karkhanon se, tanuron se, gharon se ab tu
Zinda insaanon ke jalne ki si boo ati hai
Ye nai tehzeeb agar aman ki shaidai hai
Tu phir
Roz he is shehar numa jungle main
Khud ko tareekh bhala kis liye duhrati hai ?
Woh ke jin ankhon main kuch khuwab hua kerte the
Aaj un ankhon main ek khauf larazta dekha
Aik hiqarat dekhi
Woh jo masoom the, kamzor the
Un hathon main
Jaan le lene ki shureeda see taqat dekhi
Kia zarurat ke bure kaam hon tareeki mein
Kia zarurat k koi parda rawa rakha jaye
Her subh log uthae hue apne jhanday
Or chehron pe sajaye hue insaan ka roop
Apnay boseeda nazryon ko naye naam diye
Sirf or sirf
Riwajon ko bata kar qanoon
Apni rasmon ke liye
Apni riwayat ke liye
Apni shohrat ke liye
Deen o mazhab ko banaye hue dhaal
Qatal kerte he chale jate hain
Maqhooron ko
Masoomon ko
Majbooron ko
Roz he ek nai tareekh raqam hoti hai
Aaj phir aankh khuli hai to main is souch main hoon
Is naye din ka badal or koi cheez nahi ?
Yaad e Allah kroon, sajda kroon, shukr kroon
Aankhon main roshni
Ek subh -e- yaqeen ki rkhoon
Ya inhain bund karoon
Takeh nafrat ke kharabe main ye kal ka suraj
Phir meri souch ko nashad nahi ker paye
Subh e rafta ki tarha
Guzre hue kal ki tarha
Phir yeh suraj mujhe barbaad nahi ker paye
Aankh jo khul he gai hai tu main is souch main hoon
Kash ye aankh na khulti, na sawera hota
Bas
Andhera he, andhera he, andhera hota!
(Sept. 29, 2001)
Na samjhe khud he manzil ko to samjhane kahan jate
Ye dunya ek sarae hai, ye btlane kahan jatey
Khuda ka shukr ke mehfil main the do chaar begane
Diye jo zakhm apnon ne, woh dikhlane kahan jate
Nigahon se ayan sab ho gaya, achcha hua sahab
Vagarna bar-e-dil le kar ye deewane kahan jate
Tumhain mehfil me mouqa baat karne ka kahan milta
Na hote hum jo deewane, to afsane kahan jate
Hamain der o haram ka bhi sahara gar nhi milta
Tu apni khwahishon ko le ke behlane kahan jate
Na jalwa toor par hai ab, na hai ghaar e hira main ab
Saraab-e-zindagi ke bhaid khulvane kahan jate
Adeel achcha hua ek aaina khane main ho warna
Tum apne aap se milne khuda jane kahan jate
(Jan. 27, 2002)
Ba ejaz-e-der-o-haram dekhte hain
Jo dekha na jae woh hum dekhtey hain
Dikhao humain koi pur aman basti
Ye sab kuch tu hum dam ba dam dekhtey hain
Suna hai ke mehshar bapa woh kare ga
Chalo chal ke us ke karam dekhte hain
Mohabbat se shayad pukare koi phir
Palat kar bohat ghar ko hum dekhte hain
Tha dushwaar nazron ka hatna jidhar se
Hum ab us taraf kam se kam dekhtey hain
Diye ja rahe hain suboot-e-wafa woh
Tu lehje ke hum zer-o-bam dekhte hain
Bazahir Adeel us se rishte bohat hain
Rakhe ga woh kitna bharam dekhte hain
(May 22, 2002. Michigan)
Aaj hum jashan manate hain, kis azadi ka?
Pehli aazadi jo wirse main mili thi hum ko?
Ya woh aazadi jo ek doosri hijrat se mili?
Pehli azadi ki khatir sahab!
Unginat logon ne qurbani di
Lakhon ghar ujre
Nai basti basane ke liye
Ek pehchan banane ke liye
Ek nai nasal bachane ke liye
Aaj
Ek nisf sadi baad
Isi basti main
Jo nai nasal janam leti hai
Apni rasmon ka hawala ban kar
Apne purkhon ka pata deti hai
Un ki rasmon se mila deti hai
Aaj
Us basti main
Hai jashan nai dunya main
Log, jouq dar jouq chale aate hain
Apne bachon ko liye, apne piyaron ko liye,
Take rasmon ki, revajon ki, ho pehchan unhain
Kehne pae na yahan koi bhi anjaan unhain
ek hi din ko sahi!
phir wohi mahoul mile
dil milain ya na milain
hath se hath mile
phir se wohi baat chale
phir wohi rang jame
Jashan e mulaqat chale
Jashan jab rang pe tha
Souch ne pehloo badla
Soucha
Agli nasl janam le gi jab yahan
Rasm-o-rivaaj hon ge humare bhala kahan
Haathon main un ke ho ga tu kis mulk ka nishaan
Soucha bata sakain ge ye bachche kahan ke hain
Dunya main kis hawale se ye jane jain ge
Iqdaar se kahan ki ye pehchane jain ge?
Ab hum hairan se mele main khare souchte hain
Hijrat-e-sani se kuch shaan barhai apni
Ya hum ne
Sirf pehchan ganwai apni?
(Houstuon, Aug. 15, 2002)
Din aman-o-aashti ka manain ge agle saal
Roothe dilon ko phir se milain ge agle saal
Barood par jo paise hooe kharch is baras
Aflas o bhook un se mitain ge agle saal
Har shakhs jis ko dekh ke samjhe, he mera ghar
Kuch is tarha se ghar ko sjainge agle saal
Jo ho gaya so ho gaya, aoo karen ye ehed
Apne tamam wade nibhain ge agle saal
Tum us se gar milo ge, tu hum tum se kiyon milain
Aise tamam jhagre mitain ge agle saal
Khaki kafan pehan ke jo sarhad pe ja base
Hai ye dua woh lout ke aain ge agle saal
Ek baar or dekh lain jee bhar ke us taraf
Hum apni khwahishon ko sulain ge agle saal
Chand or zawioon se parhain ge abhi unhain
Khat tere yaar sare jalain ge agle saal
Is saal tu hain zakhm hare yadoon ke Adeel
Koshish ye he ke tujh ko bhulain ge agle saal
(Houston, Sept. 6, 2002)
Kale badal jab umad ke aa gaye
Har taraf bus teeragi barsa gaye
Kitne aangan kar rahe the intezar
"Aaftab ubhra tu baadal chha gaye"
Har saher tareek shab main dhal gaye
Har ujale ko andhere kha gaye
Main achanak roshni main aa gaya
Or aankhon par andhere chha gaye
Roshni, pani, hawa hote hooey
Baghbaan ye phool kiyoon murjha gaye
Harf-e-Haq ki Zindagi ke waste
Kul bahattar lakh se takra gaye
Such ki khatir zeher ka piyala piya
Or suraagh zindagi bhi pa gaye
Zindagi bhar bhool na paae unhain
Lamha bhar main jo nazar ko bha gaye
Raasta daryaoon ne badla Adeel
Or dar -o- deewaar mere dha gaye
(Houston,15July,2003)
Agar tum ko mayasser ho
Kabhi ek sham-e-tanhai
Or
Koi beeta houa lamha
Koi beete hoi sa'at
Tumhare saamne phir se
Meri tasveer le aye
Mujhe awaaz de lena
Ke main
Tum main he rehta hoon!
Zamee bhi aarzi, rishte bhi jhoote hain
Nazar aakash par daalo
Ke shayad
Dur tak bikhrey sitare
Tumhain bhi roshni de dain
Tumhain bhi zindagi de dain
demaagh-o-dil kr goshe main lagane ko
Koi khoi hoi
Tasveer he de dain
Agar tasveer se dil ki
Kabhi kuch baat karni ho
Ose awaaz de lena
Ke woh bhi
Ek tumhara aks he to hai
Kahin aisa na ho ek din
Koi gustakh sa jhounka
Kisi bebaak lamhe main
Sitaroon se bani tasveer se
Parde hata dalai
Agar youn ho to aise main
Ose ek naam de dena
Ose awaaz de lina
Agar awaaz dene par
Kahin gumnaam se kuch hurf mil jain
Tu un harfon ko chun lena
Unhin harfon se tu sahab
Tumhara naam banta hai
Humara naam banta hai
Tum aankhen band kar lena
Ke haan! is baar shayad tum, mujhe mehsoos kar pa'o
Ke main
Tum main hi rehta hoon !!
(Feb. 2004)
In aqeedon ke, nasab ke, naam ke
Khatam ho jhagre ye subh-o-sham ke
Ye malookiat, ye sab dehshat gari
Or sab jhande tale islam ke
Be asar hain un pe sab ism-o-tlism
Woh jo aashiq hain tumhare naam ke
Kia tamasha hai, sar-e-aaghaaz hi
Muntazir baithe hain sab anjaam ke
Zindagi bhar bus tag-o-dou he rahi
Kaash din aajain ab aaram ke
Kon hai jo such ko apnae Adeel
Koi to uthe jigar ko tham ke
(Feb. 8, 2004)
'Rah-e-khizan main talash-e-bahaar karte rahai'
Woh be wafa tha magar hum to piyar karte rahai
Hai kia tamasha udhar runjishain he barhti rahain
Talluqaat humain ustwar karte rahai
Guzar gai jo ghari lout kar na aai kabhi
Talash sham-o-saher baar baar karte rahai
Tumhari chah main jitne bhi hum ko zakhm milai
Mohabbaton main hum un ka shumaar karte rahai
Teri ana pe humain ikhteyar hi kab tha
Tamam umr tera intezar karte rahai
AÏdeel ghar to sabhi ne saja liye hain magar
Hamain to shahr ke gham ashkbar karte rahai
(Funplex, Houston.Feb. 14, 2004)
Mohabbat ki saza pai bohat hai
Humare gham main gerai bohat hai
Khara maile main aksar souchta hoon
Mere ander to tanhai bohat hai
Nahin hai or koi sirf main hoon
Falak se ye sada aai bohat hai
Kama lain shohratain sasti si hum bhi
Magr is main tu ruswai bohat hai
Tasavvur shart, sab kuchh saamne hai
Nazer walon ko beenai bohat hai
Na bhar pain ge ab chashm-e-karam se
Ke in zukhmon main gehrai bohat hai
Adeel us ko kahan tum bhool paye
Bhulane ki qasam khai bohat hai
(Feb. 7, 2005)
Hain kisi ki aankhon se ye chiragh wabasta
In ko youn bujhane se roshni nahi ho gi
Roshni dimaghon ke aas pass bhi rakhye
Sirf dil jalane se roshni nahi ho gi
Haan! zaroor aain ge dekhne tamasha log
Apna ghar jalane se roshni nahi ho gi
Subh ke chiraghon main tail hi nahi hota
In ko lou dikhane se roshni nahi ho gi
Aasman roshan hai, mehr-o-mah-o-anjum se
Bhai door jane se roshni nahi ho gi
Mustaqil mizaji bhi lou main chahiye har dam
Sirf jhilmilane se roshni nahi ho gi
(Houston, March 2005)
Khaali dunya main guzar kia karte
Bin tere umr baser kia karte
Too ne manzil hi badal di apni
Hum tere saath safar kia karte
Aik hi khwabe junoo kaafi tha
Dekh kar bar-e-digar kia karte
Apni hi uljhanoo main uljhe the
Hum teri zulf ko sar kia karte
Jabke raste main bikharna hi tha
Baandh kar rukht-e-safer kia karte
Jisam ka bojh liye loute the
Shaher walon ko khabar kia karte
Jo kia too ne khuda janta hai
Hum tere saath mager kia karte
Khud zameen orh li hum ne aakhir
Or bay samt safer kia karte
(Houston, June 2005)
Aisi tanhai ke ghar dasht lage
Aisa sannata, agar patta hille
Aankh be saakhta darwaaze ke samne uth jaye
Kaash aajaye koi
Phir mohabbat ka safeer
Meri anjaan si chahat ka aseer
Woh jo aajae tu is aangan main sitare ajain
Dar-e-deewaar main phir se ek baar
Aane wale ke muqaddar ke tufail
Meri manzil mera ghar, mere kinare aajain
Jab bhi kam hoshi ke aalam main
Meri aankh khule
Dar ki janib uthe
Dehleez pe ja ker thahre
Bus yehi aas ke jasy
Abhi aata hoo ga
Meri janib bhi koi
Sirf mohabbat ka safeer
Meri chahat ka aseer
Roz hi sunta hoon
Dahleez pe dil ki dastak
Or dastak ke udher
Khud khra paata hoon
Aik taalab main
Therhe hoe paani ki terha
Mera hi aks
Ek aeena dikhata hai mujhe
Or batata hai mujhe
Meri dahleez per koi bhi nahi
Bas main hoon !
Aik anjaan si chahat ka safeer
Aik gumnaam mohabbat ka faqeer
(Houston, Oct.. 2005)
Na shaher-e-ilm na kuch us ka baab hain hum log
Ke satah-e-ilm pe sahab, habaab hain hum log
Kisi bhi haalat main auqaat ko nahi bhoole
Abu turab the moula, turab hain hum log
Bhare pare woh sehan woh makaan chhor aye
Kahan ke achche hain khana kharab hain hum log
Jawab apne sawalon ke pasko shayed
Jo ho sake tu parho, ek kitaab hain hum log
Samajh rahe hain tanzil ko irteqa ka amal
'Jagane aye koi mahw-e-khawab hain hum log'
Bas apne rung samete bhatak rahe hain Adeel
Chaman kahan hain woh jis ke gulaab hain hum log
(Houston, Nov. 14, 2005)
Piyar Karte Raho!
Sab ki sunte raho
Piyar karte raho
Or kuch na kaho
Chahe bolain na woh
Lab ko kholain na woh
Dil alag baat hai
Apne lehje main bhi
Piyar gholain na woh
Apna jo farz hai
Is tarha ho ada
Jaise ek qarz hai
Koi jo kuch kahe
Us ki sunte raho
Piyar karte raho
Or kuch na kaho
Be khayali main hi
Lub agar khul gaye!
Or zaban per kabhi
Koi such aagya!!
Youn samajh lou ke phir
Silsile jitne the
Darmiyan jo bhi tha
Khawab daikhe the jo
Sab bikher jain ge
Aisa karna nahi !!
Sab ki sunnaa magar
Tum bikharna nahin
Masle sab ke sab
Hain safaid woh seyah
Maslon main kabhi
Rang bharna nahi
Dil main gar piyar ho
Lab pe iqraar ho
Piyar he piyar bus
Hurf-e-izhaar ho
Gar ana ye kahe
Dil na mil paye ge
Us pe mat jaiyo
Khoti he ye ana
Us se kuch na bana
Dil ke batainn suno
Faasle se sahi
Piyar karte raho
Or kuch na kaho
Rasta aik hai
Maddua aik hai
Ek humari he kia
Saari dunya ka hi
Silsila aik hai
Aik aye the hum
Aik aye the tum
Aik hai ye safar
Bheer kitni bhi ho
Apni apni jagah
Her koi aik hai
Naam hain go juda
Per kudha aik hai
Bus kudha ki tarha
Sub ki sunte raho
Piyar karte raho
Or kuch na kaho
Kehne sunne se tu
Kuch badalta nahi
Raat jati nahi
Din theherta nahi
Hone wala hai kia
Kuch bhi khulta nahi
Waqt kam hai buhat
Itne kam waqt main
Jis qadar kar sako
Piyar karte raho
Or kuch na kaho
(Houston. Dec., 2005)
Ya Khuda aaye ya aa jaye maseeha koi
Dard jab had se guzar jaye dawa kese ho
Fikr ab to yehi rahti hai mujhe sham-o-sehar
Main ose kese bhula doon, woh mera kese ho
Kese samjhaoon ye dunya ko ke mumkin he nahi
Jo mere zaat ka hissa hai, juda kese ho
Saath dene ka kabhi hum ne kia tha wada
Ab hain is souch main, wada ye wafa kese ho
Dil ko taskeen isi souch se mil jati hai
Woh jo khud apna na ho, paaya mera kese ho
Mangna chahte hain hum bhi bohat kuch tujh se
Par humain ye nahi aata ke sada kese ho
Haath phalaye jo baithe ho mussle pe Adeel
Harf he saath na dain gar tu dua kese ho
(17 - April, 2005)
Ghar ata kar, makan se kia hasil
Sirf wehm-o-gumaan se kia hasil
Be yaqeeni hi be yaqeeni hai!
Is zameen-o-zaman se kia hasil
Souch age barhe to baat bane
Sirf umr-e-rawan se kia hasil
Dil bhi asoodha chahiye warna
Dolat-e-bekraan se kia hasil
Aik chehra hai kaeynaat mare!
Soorat-e-digaran se kia hasil
Jub khooshi rooh ki na sath rahi
Raahat-e-jism-o-jaan se kia hasil
Dil main jab jins-e-aarzoo he nahi
Sirf khali dukaan se kia hasil
Apne a'amaal ko bhe badlo Adeel
Sirf aah-o-fughan se kia hasil
(Houston, June 2005)
Hum jiye saya-e-dua main Adeel
Zindagi ki amaan main kab they
(Houston, July 2005)
Ye zameeni bhi hai zamaann bhi
Fitrat-e-ishq aasmaani bhi
Shart hai jaan se jaiye pehle
Hai ajab umr-e-javedani bhi
Tum ne jo daastan sunai hai
Hai wohi tu meri kahani bhi
Kitne dilchasp lagne lagte hain!
Mere kisse teri zabaani bhi
Hain zaroori bohat humare liye
Ye fiza, aag or paani bhi
Ho gai khatam ek kiran ke sath
'Raat bhi, neend bhi, kahani bhi'
Mat unhain janye dar-o-deewar
Un main yadain hain kuch suhani bhi
In deewaron pe he hoi tehreer
Mere maa baap ki jawani bhi
Hum jo ghar chor kar chale aye
The woh ajdaad ki nishani bhi
La mkan he ka zikr-e-khair AÏdeel
Go hain kisse bohat makani bhi
(Houston, July 2005)
Gham ana or aan ke kab they?
Hum bare khandaan ke kub they
Khul gaye jo bulandion ki tarf
Per woh oonchi uraan ke kab they
Hum safar mera nakhuda kab tha
Pat khule badban ke kab they
Ja base us jahan main jo log
Log woh us jahan ke kub they
Khaak the khaak ho gaye sahab
Hum bhala aasman ke kub they
Jin se khatra tha zindagi ko meri
Teer ye us kamaan ke kab they!
Be sabab daar par gaye jo AdÏeel
Woh kisi dastan ke kab they
(Houston, Sept. 2005)
Tu jo chahe bhi to sayad nahi hone ke
Lab humare lub-e-faryaad nahi hone ke
Us ke cooche main mian khaak urate kiyon ho
Tum se majnon tu ose yaad nahi hone ke
Koi achchi bhi khaber kaan main aaye yaarab
Aisi khabron se tu dil shaad nahi hone ke
Tu rahe hum se khafa kitna he chahe laikin
Hum magar tujh se tu nashaad nahi hone ke
Kaar-e-dunya ko hain darkaar hamari umrain!
Kaar-e-dunya se tu aazad nahi hone ke
Unginat jaagte chehre gaye mati ke tale
Ab naye zulm to ejaad nahi hone ke!
Ta qayamat wohi ek naam rahe ga abaad!
Hum kabhi mustaqil abaad nahi hone ke
Khaak ho jain ge ye to hai muqadder apna
Hum magar woh hain ke barbaad nahi hone ke
Chahe Namrood ho, Firoun ho ya ke ho yazeed
Sahab-e-shijra-o-aulad nahi hone ke
(Houston, 14 Oct. 2005)
Hareef-e-jaan ki tarafdarian to honi hain
Siasaton main riakarian to honi hain
Shia'an-e-haq ki taraf aao par khayal rahey
Ke us taraf zara dushwarian to honi hain
Jo waqt jitna guzar jaye saath behter hai
Phir aik din mian tanhaiyan to honi hain
Hum apni suhbatain, rasm-o-riwaaj chhor aye
Dayar-e-ghair hai, gustakhiyan to honi hain
Kisi pe tabsera kesa, tum apne chaak sio
Karo ge aisa tu ruswaiyan to honi hain
Yahan pe dawa-e-danaai kis ko hai sahab
Hum aadmi hain tu naadaniyan to honi hain
Naya zamana, naye log hain nai tehzeeb
Purane logon ko hairaniyan to honi hain
Hum aa gye hain gulistan-e-rang-o-boo main ÏAdeel
Humare saath ye gull kariyan to honi hain
(Dec. 2005)
Dilon ki baat to bhagwaan keh nahi sakte
Ajab banaye hain insaan keh nahi sakte
Jo apne ghar main na apna libaas pahn sake
Bane ga jad ki woh pehchan keh nahi sakte
Ajab bahaar ka aalam hai meri basti main
Hai khakdaan ya guldaan keh nahi sakte
Kahen qasida ke noha kahen pa kese kahain
Hai aisa lafz ka fuqdaan keh nahi sakte
Badalte rang zamane ke dekh kar sahab
Hum aaj kitne hain hairaan keh nahi sakte
Ajab rang-e-falak hai ajeeb khamoushi
Kidhar se aye ga toofan keh nahi sakte
Bohat udaas bazahir yahan hain sab chehre
Dilon me kitni hai muskaan keh nahi sakte
Adeel fun ki mahaarat ko us ki mante hain
Magar woh kitna hai insaan keh nahi sakte
(Jan., 2006)
Raah main koi bhi deewar nahi ho sakta
Tujh se milna mera dushwaar nahi ho sakta
Jo tamanna liye hum jeete rahai aaj talak
Us tamanna hi ka izhaar nahi ho sakta
Jis main himmat nahi halaat badal dene ki
Woh tere khawabon ka maymaar nahi ho sakta
Us ki tu aik bhi surkhi main nahi khoon ka rang
Ye mere shehar ka akhbaar nahi ho sakta
Ab ke khalwat ho mayassar tu bataain tum ko
Youn sar-e-bazm tu iqrar nahi ho sakta
Jhoot chhup jaye chhupane se ye mumkin hai magar
Such se bhai kabhi inkaar nahi ho sakta
Paas jo bhi hai wohi nazar karo barh ke Adeel
Raah-e-haq main deya bekaar nahi ho sakta
(May, 2006)
Nazr-e-Mustafa Zaidi
Sehra-o-dasht-o-sro-o-saman ka shareek tha
Woh dard ki dawa, dukhan ka shaerek tha
Woh kia samajh sake ga mere ishq ka muqaam
Jo rooh ke safar main badan ka shaerek tha
Dekhi na hum ne jis ki jabeen per kabhi shikan
Woh dil ki aik aik chubhan ka shaerek tha
Ek lamhe ko woh aya tasawwur main to laga
Jese woh sare din ki thakan ka shaerek tha
Khamoshion se aaj hain hum mehv-e-guftagoo!
Woh saath he nahi jo sukhan ka shaerek tha
Allah us chiraagh ko roshan rakhe sada!
Jo tairgi main pehli kiran ka shaerek tha
Seraab ker gaya kisi aangan ko jo Adeel
Woh meri piyaas, meri ghutan ka shaerek tha
(Houston, 29 - June, 2006)
Khayal
Mohabbaton ki nafee ke samer lagain jin par
Main un khayalon ko naslon main bo nahi sakta
Hansee labon pe saja sakta hey khoshi k bager
Bager gham k koi shaks ro nahi sakta
(August, 2006)
Chali hai chhor kar to kiyou'n bahaar-e-gulista'n mujh ko
"Khuda jaane kaha'n le jaae ab baad-e-Khiza'n mujh ko"
Koi lashkar na sachaai ko paspa kar saka ab tak
Bhala rokaingey kaise phir tere teer-o-sana'n mujh ko
Jala doonga husool-e-maqsood ki khaatir
Jalaani par gaeen gar saari apni kashtiya'n mujh ko
Na sham'a-e-anjuman main hoo'n na parwano'n ka mela hai
Kaha'n tha main kaha'n le aai hai umr-e-rawa'n mujh ko
Mujhe ghar ke charagho'n ne jala kar raakh kar Dala
Jalaane aarahi hain dur se kiyou'n bijliya'n mujh ko
Suna tha sab bhula baithay Adeel Dil-e-shikasta ko
Na jaane aarahi hain shaam se kiyou hichkiya'n mujh ko
(20th - Oct, 2008) (MuSahfi ki Zameen main)
Raah sunsaan raahbar Khamosh
Kya sabab, kis liye safar Khamosh
Ik zamaana ke bolta tha falak
Ik zamaane se hai magar Khamosh
Jin ki haibat ki goonj thi har su
Aaj woh loug kis qadar Khamosh
Jo bhi Maa'n ki zabaa'n se dour huwe
Hain wohi loug dar badar Khamoush
Be khabar loug ho'n tu shikwah nahi
Haif sad haif baa khabar Khamoush
Zindagi ka nisha'n sukhan hai Adeel
Is jaha'n se na tu guzar Khamoush
(4-Feb., 2009)
Hijr qismat main tha wisaal na tha
Haal dil ka kabhi bahaal na tha
Khoi pehchaan or malaal na tha
Is se barh kar koi zawaal na tha
Aise bhi dekhe hum ne din jinka
Khawaab main bhi kabhi khayaal na tha
Apne hone ka hum ne poochha jawaaz
Is se behtar koi sawaal na tha
Haal-e-Dil bas ke ye tha tere baghair
Haal aisa ke koi Haal na tha
Aaj jesa hai chaar su Saahib
Pehle apno'n ka aisa kaal na tha
Kuchh zayaada they rozgaar ke gham
You'n nahin ke tera khayaal na tha
Sab hunar they Ata-e-Rabbaani
Un main apna koi kamaal na tha
Apni apni thi fikr sab ko Adeel
Or kisi ko mera khayaal na tha
(20 - Oct, 2008)
Zindagi bhar isi gumaan main hum
Bas tere saath saath chalte rahai
Kaash tujh ko khayal-e-qurbat ho
Kia khabar
Tujh ko bhi mohabbat ho!
(Houston. Jan., 2007)
Gham ka koi bhi manzar
Jab ba faiz-e-beenai
Roh main utarta hua
Dil talak pohanchta hai
Tab kahain pohanchti hai
Aankh tak nami dil ki
Jis ki khushk aankhon ko
Ye nami nahi haasil
Us ke paas sub kuch hai
Sirf hai kami dil ki!
(Houston, March. 2007)
Bus lamhai bhar main faisla karna para mujhe
Sub chhor chhar ghar se nikalna para mujhe
Jab apni sar zameen ne mujh ko na di panah
Anjaan vaadion main utarna para mujhe
Paoon main aable the thakan umar bhar ki thi
Rukna tha, bethna tha, pa chalna para mujhe
Apni parakh ke waste toofan ke darmiyan
Mazboot kashtion se uterna para mujhe
Tari ana ke haath main the tere faisle
Tu, to badal na paya, badslna para mujhe
Be inteha tazaad tha donon ke souch main
Kuch yuon bhi raaste ko badalna para mujhe
Ye bhi hoa ke badil-e-nakawasta kabhi
Zinda haqiqaton se mukarna para mujhe
Yakja raha ek umar magar teri deed ko
Maanind musht-e-khaak bikharna para mujhe
Aaghaz apne bas main na anjaam hi Adeel
Ek zindagi guzaar ke marna para mujhey
(Houston, Oct. 2007)
Hum ne thama yaqeen ko guma chhor kar
Ek taraf ho gaye darmiyan chor kar
Dil na mana jeain kehkashan chhor kar
Ja ke baste kahan khandan chhor kar
Apna ghar chhor kar bastian chhor kar
Be amman ho gaye hum aman chhor kar
So gaye beach main dastan chhor kar
Hum alag ho gaye karwan chhor kar
Kese nadan the hum sab kahan aagaye
Apne aaba-o-jad ke makan chhor kar
Sath chalte rahey ye na soucha kabhi
Kon jaye ga kis ko kahan chhor kar
Aaj bhi muntazir hum wahin hain tere
Kal gaya tha hain too jahan chhor kar
Raah apni nikale tu manzil mili
Hum chale jadah-e-rahbaraan chhor kar
Hai ye maloom gar jism-o-jaan se gaye
Sab chale jaain ge mehrban chhor kar
Gar tumhari tamanna hai daim raho
Jao zehnon main roshan nishan chhor kar
Tum to tanha hoye jetey jee hi Adeel
Log jatey hain tanha jahan chhor kar
(Houston, Dec. -. 7, 2007)
Dil ki dharkan ko suna ghour se kal raat Adeel
Jis ko main dhondta rehta hoon basa hai mujh main
(Sept.. - 2, 2006)
Main is se qeemti shay koi kho nahi sakta
Adeel maan ki jag'ha koi ho nahi sakta
Mere khuda yahan darkaar hai maseehai!
Lahoo ko aadmi ashkon se dho nahi sakta
Ye or baat hai ho jaye mo'jeza koi!
Ye gham khoshi main badal jaye ho nahi sakta
Zara ye jaan nikal jaye to milain ge zaroor
Ke zindagi main to ab aisa ho nahi sakta
Teri duain hamesha rahain gi saath magar
Main tari gaud main sar rakh ke so nahi sakta
Khuda ka shukr ke waqif hai haal-e-dil se too
Haroof main tu tera gham samo nahi sakta
Juda jo ho gaye tasbeh-e-roz-o-shab se Adeel
Main zindagi main woh dane pro nahi sakta
(Aug., 2006)
Ronaqain ghar main rahain bas usi awaaz ke sath
Go thin takleef main lekin rahain ejaz ke sath
Be gharz milti rahain maan ki duain har dam
Log awaaz bhi dete nahi awaaz ke sath
Waqt-e-rukhsat bari rounaq thi, so aaya ye khayal
Kon ayega yahan ab mari parwaz ke sath?
Ghar kahan ghar rha tanhai hai, deewarain hain
Hum na jee paye ge esey naye andaz ke sath
Sare kaamon ke liye maan ki nasihat ye thi
Fikr-e-anjaam hamesha rahe aghaaz ke sath
Nit naye pehloo the us zaat ke har roz Adeel
Jaise naghmat chupe rahte hain har saaz ke sath
(Houston, Nov. 2006)
(Ammi Ki Jaanib Se)
Waqt-e-rukhsat chashm-o-abro ke ishare dekhna
Hum bhanvor ke darmiyan hain tum kinare dekhna
Us ki peshani pe chalte waqt ye tehreer tha
Mil sakain ge ab na hum jese sahare dekhna
Zindagi main jab tumhain tanhai se milna pare
Aakhri din kis tarha hum ne guzare dekhna
Waqt-e-mushkil jab pukaro tum madad ke waste
Kitne is dunya main hain baqi tumhare dekhna
Dekhne ke waste jab kuch na reh jaye Adeel
Bas hamari tarha se tum bhi sitaare dekhna
(Nov. 26, 2006)
Tu mujh se door chali jaye a'in mumkin hai
Magar woh aks jo meri nazar main rehta hai!
o
Teri khushboo ke sath aaj Adeel
Phir se laut aai meri beenai
(Dec. 2006)
ADEEL NUMBER
Monthly SUKHANWAR Karachi
(March 2005)
Ek din achanak bara hogaya woh
Juda ho gaya woh
Chale the jahan se
Wahin aa gaye hum
Buhat ronaqain theen
Buhat sari khushyan
Achanak
Khamoshi ka ghalba ye kaisa?
Kahan aa gaye hum?
Naya mor hai zindagi ka ye shayed
Ya ek bar phir se
Ye tareekh apne ko dohra rahe hai!?
Such bolne ke waste inaam bhi chale
Sub kaam chal rahe hain to ye kaam bhi chale
Ho Meer ki zameen main Iqbal ka payam
Gar ho milaap aisa to paigham bhi chale
Koshish zaroor shart hai per is ke baad tu
'Sub kaam us ko sonp jo kuch kaam bhi chale'
Un per khuda ki rehmatain nazil hoin zaroor
Rah-e-khuda main log jo do gaam bhi chale
Us ka bulawa aane ki bas dair thi mian
Kia naam wale, sahebon gumnaam bhi chale
Arzaan rahi woh shay jo farahum rahi yahan
Miqdaar main kami ho to kuch daam bhi chale
Aulad se chale na chale is liye Adeel
Mehv-e-sukhan hon ta ke mera naam bhi chale
Khud main ek toofan the, maddojazr ke log the
Kia kahain purkhe humare kis jigar ke log the
Us taraf the baakamal -o- ba hunar sare miyan
Is taraf to bus faqat ek do hunar ke log the
Baat hai aasman karni, kaam hai mushkil jehad
Jaan se jo bhi gaye jan-o-jigar ke log the
Jo rahe oonchi uranon main falak tabah falak
Aik din aaya ke wo be baal-o-per ke log the
Waqt kia badla ke sub raste badal kar chal diye
Jane mare yaar bhi kesi dagar ke log the
Ek bhi maidan main thehra na waqt-e-imtehan
Kehne sonne ko bohat wo karr-o-wafar ke log the
Sard karne sholo ko kal shehar aaya tha Adeel
Jo hawa dete rahay apne hi ghar ke log the
Harf-e-shikwah tu ja'n se uathta hai
Nala kab aasma se uathta hai
Mujh main kia deh raha hai roz -o- shab
Shor sa jisim -o- ja'n se uathta hai
Dil tu jal bujh chuka tha pehle he
"Ye dhuwa sa kaha se auttha hai"
Kal jo markaz tha meri aankho ka
Aaj woh darmiya se uthta hai
Dekhiye ja ke ab kaha thehre
Dil humara yaha se uthta hai
Sogaya jo adam ki neend Adeel
Kab wo aah -o- fughan se uthta hai
"Dil ajab shehar hai khayalo'n ka"
Sirf fuqdaan hai ujalo'n ka
Kis liye justuju ro z-o- shab
Kiyun hai anbaar ye sawalo'n ka
Kese kijiye ke aaj baqi hai
Chand lamhe , hisaab saalo'n ka
Tha zamana ke dil ki galyo main
Ek taanta tha aane walo'n ka
Ab wohi dil ba faiz tanhai
Ek maka'n makrion ke jalo'n ka
Koi batlae ke badal kia hai
Maa'n ke hathon bane niwalo'n ka
Chup na rahiye ke qatal hota hai
Be gunahon ka , nonehalo'n ka
Tum likho daastan-e-shah Adeel
Haal hi kia hai khasta haalo'n ka
Nazr -e- Jon Ailya
Or kia reh gaya hai hone ko
"Ji bohat chahta hai rone ko"
Wo zamana, ke sirf naam tera
Tha bohat aankh ke bhigone ko
Khud hi apna jawaz dhoondte hain
Roain kia hum tere na hone ko
Apni tasbih main nahi baqi
Aik aansoo bhi ab pirone ko
Nafratain khoo main bo chuke bhai
Baaqi ab kia bacha hay bone ko
Is qadar tergi se nafrat hai
Ji nahi chahta hai sone ko
Jab bhi tera khayal aata hai
"Ji bohat chahta hai rone ko"
Khuda hi jane ke kia aasma ka mosam hai
Jaha pe hum hai waha imteha ka mosam hai
Ye dhoop or ye baadal kaha theherte hai
Kabhi yaha ka raha, ab waha ka mosam hai
Har ik taraf se khabar aarahi hai jane ki
Ye chal chalao ka mosam, kaha ka mosam hai
Chalo ke hum bhi usi sarzami ke hojayen
Humari mitti main shamil jaha ka mosam hai
Main mehv-e-khaab tha jis waqt aaya ye pegham
Jo dil pe guzri hai us ke bayan ka mosam hai
Ragon ko torti purwaiyan si chalti hai
Ajeeb aaj mere jism -o- jaa ka mosam hai
Zara se bojh se daali na toot jaye Adeel
Bahar khatam hoi -- , ab khiza ka mosam hai
Tu laamaka'n hai, pa rakhna humain makinon main
Ay aasman, humain rehne de zamino main
Tum in ko kato, tarasho, koi bhi dedo rang
Rakha hai kia miya pather ke kay in naginon main
Hai aaj tashna labi, hum kabhi rahai seraab
So apni piyas sajate hain aabgino main
Hai un main aaj bhi zarkhaizi or shaadabi
Buzrug likhte rahai sher jin zamino main
Basarto ko jagao, amal karo, warna
Shumaar honai lage ga tamash bino main
Jaha pohunch ke na pahchaan pao apno ko
Khasara hoga tarqqi ke aise zino main
Bohat sambhal ke karo tabsera kisi pe Adeel
Tumhara naam na aajaye aib bino main!
Jis tarha chahiye kab kaar-e-wafa hota hai
Haq muhabbat ka kaha hum say ada hota hai
Ham bohat chahte hain aman-o-muhabbat har su
Wohi hota hai jo manzoor-e-khuda hota hai
Mushkilon main bhi buzrugon ka wazifa ye tha
Achhe kaamon ka tu achha he sila hota hai
Fitratan saaz main aawaz kaha hoti hai
'Ik zara chheriye, phir dikhiye kia hota hai
Koi majboori utha deti hai diwaar-e-ana
Apni marzi se bhala kon bura hota hai
Har wo insaan ke jo da'awat-e-haq deta ho
Na sahi qibla magar qibla numa hota hai
Nazr -e- Jigar
Ghutan zaroor barhi, dard main kami na hoi
Ghataen uthi magar aankh main nami na hoi
Jo tere dour main guzri teri inayat se
Kisi ki ho to ho, apni to zindagi na hoi
Usi ki batain, usi ka khayal tha or ab
Humari baat he kia hai, hoi hoi, na hoi
Kai charag se chahre jale bjhe lekin
"Tere baghair kabhi ghar may roshni na hoi"
Mata'a-o-maal ke hote bhi aaj chehron par
Jo pehle thi kabhi wo to shaguftagi na hoi
Main janta hoon tujhe bhi lagao hai mujh se
Pa jesi hai meri haalat kabhi teri na hoi
Wo aik shakh-e-muhabbat jo tere naam ki thi
Tere firaq main murjhai to hari na hoi
Hai waste mera aise qabeel se ke jaha
Charag bujh gaye par dil main tergi na hoi
Adeel chaha tha jin ko, bichargaye wo sab
Tamaam yadain hain baqi , koi kami na hoi
Majmu'a -e- Kalaam
Sarab-e-jan ko jaha ki chamak samajhte rahai
Wo rooh main tha jise jism tak samajhte rahai
Pata chala ke wo khak-e-haram ki khushboo thi
Hum us ko sajde main gull ki mahak samajhte rahai
Ajab thi kefiyat-e-jaa'n tawaf ke doraa'n
Hum apne aap ko jinn-o-malak samajhte rahai
Khuda ko dhondne ka kab humain khayal aya
Hum apni zaat ko us ki jhalak samajhte rahai
Ajeeb waqt guzara khuda ke ghar main Adeel
Zameen thi zer-e-qadam, hum falak samajhte rahai
(November, 1999)
Kise chupate bhala kis ko roobaroo karte
Hazaron zakhm the kis kis ko hum rafo karte
Hum aik pal main pighal jate moum ho jate
Zara jo milne ki wo hum se justejo karte
Unhain jawab main miltein muhabbatain kitni
Muhabbaton ke jo charche wo chaar soo karte
Kisi ki aankh humare liye jo nam hoti
Hum apnay dil ko sabhi ke liye lahoo karte
Humare dil ka jo ahwaal janta ye falak
Humare ashkon se rizwan bhi wazoo karte
Jaha se jang-o-jadal rafta rafta mit jate
Zara saliqe se jo loug guftogoo karte
Jo adal hota to dunya se dil lagate Adeel
Jaha main loug na marne ki aarzo karte
Gunahgar-e-jaha'n hoon riayatain kesi
Mere khuda hain ye mujh par enayatain kesi
Muhabbaton main mili hain kasafatain kesi
Juri hain naam se mere hikayatain kesi
Uri thi khak jaha se wahin pe jana hai
Safar kaha ka miya or musafatain kesi
Kaha ka beej laga tha, samar ye kesa hai
Muhabaton ke shajar per adawatain kesi
Jalao shama-e-muhabbat dilon main ghar kar lo
Buzrug chhor gaye hain kahawatain kesi
Bara sawab hai dena khushi bhi pal bhar ki
Kisi ke dil ko dukha kar ibadatain kesi
Buzrug paas nahin aaj to khayal aaya
Humain theen ghar main mayassar sa'adatain kesi
The aasma pe to kitna sakoo zami pe tha
Hamare saath main utreen qayamatain kesi
Wo jin ke waste hum apni jaa pe khail gaye
Wo hum se khail rahai hain siyasatain kesi
Hai aarti ka dia, us se or kaam na lo
Kisi ke ghar ko jala kar ebadatain kesi
Kisi ki baat na mano ye aaeena dekho
Khud apne aap se yaro edawatain kesi
Aziz jaa jinhain rakha wo dushman-e-jaa hain
Humare hisse main aaee rafaqatain kesi
Humari roshni tum ko giraa guzarti thi
Jo aaj bujh gaye hum to shikayatain kesi
Ajeeb tour hain dunya ke ab Adeel utho
Ye dour-e-kam nazraa hai wazahatain kesi
Mujhe achaanak nazar wo aai !
Main chup raha per
Kuchh is tarha se
Mere pareshan sawaal ubhre
Tamam soye khayal ubhre
Tarapti jaano ko lay ke jese
Kisi machere ka jaal ubhre
Samajh na aaya ke kia karoon main
Qadam barhaoon ke theher jaoon
Jo chand lamhon main yaad aaya
Usay sonao ke lout jaoon
Rahoon salamat ke toot jaoon
Ajeeb aalam tha jism -o- jaa ka
Qadam na uthte the shal badan tha
Gumaa'n yaqee'n tha
Wo pal qurn tha
Khayal aaya usay bataoon
Ke main wohi hoon
Ke jis pe tum meherba'n kabhi the
Khayal aaya usay jataoon
Muhabbaton ke, rafaqaton ke wo ehd-o-pemaa
Haa'n main ne chaha usay pukaroon
Qadam barhana he chahta tha
Magar achank wo phool bachcha
Jo rait se ghar bana raha tha
Pukaar utha
Main kab se ye ghar bana raha hoon
Magar samandar ko kese rokoon
Ke mere ghar ye gira raha hai
Mujhe ye behad sata raha hai
Ye mere khwabon ke sab gharondon ko
Dha raha hai, baha raha hai
'Main thak gaya hoon , thaki ho tum bhi
Chalo na maa'n ab chalo yaha se
Hamara ghar he hai sab se achha'
Main sun raha tha tamam batain
Paseena mathe se beh raha tha
Tha roshni main pa geh raha tha
Main tha salamat ke dah raha tha
Ajeeb aalam tha jism -o- jaa ka
Qadam na uthte the shal badan tha
Yaqee'n gumaa'n tha
Wo pal qurn tha
Jo aaj sehra hai kal chaman tha
Isi tazabzub main tha abhi main
Ke
Mere mathe ko nanhe haathon ne youn hilaya
Ke jese mujh ko jaga rahay hon
Palat ke dekha
To meri beti sirhane bethi
Mera kandha hila rahi thi
Main so raha tha
Wo dihre dihre jaga rahi thi
Hai kia haqiqat batarahi thi
(16 - May, 1994)
Phool Bachche
(Mexico ke bachcho ke naam)
Sazaye aadam ke lakhon barson ke baad bhi
Us ke phool bachchay
Galazaton ke hain darmiya'n kiyun
Jehalaton ke hain darmiya'n kiyun
Ajab manzar meri nazar se guzar rahay hain
Main kese likhoon jo main ne dekha
Kinare raston ke kitne bachche
Sajaye bethain hain jo dokanain
Unhain koi maktabon main le ja ke
Aagahi ka sabaq parhaye
Unhain bataye ke zindagi kia hai kia nahi hai
Main kese likhoon jo main ne dekha
Ye motron ka hajoom-e-peham
Dhooein ke baadal main phool bachche
Sarak per pal kar bare huwe hain
Zarooraton main gare howe hain
Main kese likhoon jo main ne dekha
Ye phool bachche
Dikha ke kartab youn dekhte hain
Ke jese hum sab se poochte hon
Ke hum main tum main ye farq kiyoun hai?
Humara dil bhi hai sab ke jesa
Magar humare ghareeb dil ko hai aas itni
Ke aane waali hai ab jo motor
Wahin se shayad mile ga paisa !!
Main kese likhoon
Ke aise lakhon yateem bachche
Sarak pe soain, sarak pe jagain
Talab main paise ki dorain bhagain
Magar usay ye kabhi na paye
Main kese likhoon
Ke in ki qismat sraab si hai
Samajh sako to samajh lo sahab
Ye phool bachche
Sawali aankhon se keh rahai hain
Ye dawat -e- fikar de rahai hain
Tumhari ki nazrain puhanch sakain to
Jo un ke chehron ko parh sakain to
Ate howe gard gard chehre
Lagain ge tum ko bohat sonhere
Sono jo tum sun sako tu bhai
Ye phool chehre, ye phool bachchay
Sadain raston se de rahai hain
Ye aaj hum sab se keh rahai hain
Jo dekh pao tu hum ko dekho
Humari aankhon main aankhen daalo
Bas ik nazar tum jo dekh pao
Humare dil main jo jhank pao
Humare chehre bhale lagain ge
Main kese likhoon jo main ne dekha
Hazaar chehron ki dastanain
Hazaar pehron se muntazir hain
Sawaali chehre ye puchte hain
Khudaye barhaq
Tere tarazoo ke dono palre
Kab un ke haq ke naqeeb honge
Mua'ashre ke ye do kinare
Mere Khuda kab qareeb honge !
(2 - December, 1994)
Sahar main raftagaa'n ke hum bhi hain
Or kuch din yaha ke hum bhi hain
Ye alag baat tum na parh pao
Warna is dastaa'n ke hum bhi hain
Ye na samjho tumhi akele ho
Muntazir dostaa'n ke hum bhi hain
Sar utha ke chale to yaad aaya
Bas main umr-e-rawaa'n ke hum bhi hain
Rah per ikhtelaaf ke ba wasaf
Saath is kaarwa'n ke hum bhi hain
Is tawaqqo main wo nawaze ga
Dar pe ek meharba'n ke hum bhi hain
Wo bhi kam kam zami pe aata hai
Or kuch aasma ke hum bhi hain
Jis main sadyon ki dafan hai tareekh
Usi hindosta'n ke hum bhi hain
Nahin gardish main sirf tare hi
Sath is kehkasha'n ke hum bhi hain
(31 - January, 1995)
Bazm main tere na hone ka sawaal aaya bohat
Too nahin tha aaj tu tera khayal aaya bohat
Dekhte he dekhte shahon ki shahi chhin gai
Ba kamaalon per zamane main zawaal aaya bohat
Jehel ke saaye main gehri neend main sota raha
Haan azaa dene ko masjid main bilal aaya bohat
Saya-e-aaseb hai mat jana tum chouthi taraf
Us taraf jo bhi gaya, wapas nidhaal aaya bohat
Teri janib aa raha hoon rooh ki taski'n ko main
Hasratain dil ki main dunya main nikaal aaya bohat
Main chatanon ki tarah bahir se saakit tha Adeel
Phir bhi aksar zaat main meri ubaal aaya bohat
(September, 1996)
Nehaa fana main baqa hai, zara sambhal ke chalo
Ye khak, khak-e-shifa hai, zara sambhal ke chalo
Nai kasoti pa parkhain ge phir se loug tumhain
Miya ye shehar naya hai, zara sambhal ke chalo
Har aik zehan main andesha haye dur daraz
Har aik lab pe sada hai, zara sambhal ke chalo
Hain us ki khaak ke perde main aasman kai
Zamin-e-karb o bala hai, zara sambhal k chalo
Jaha se tum ko payam-o-salam aate hain
Wo shehar, sheher-e-jafa hai, zara sambhal ke chalo
Ye sahen arz-e-haram hai ba ahtiyaat qadam
Bohat qareeb khuda hai, zara sambhal ke chalo
Abhi kisi ki jhalak hai har aik chehre main
Abhi ye zakhm naya hai, zara sambhal ke chalo
Judaiya ye kahin daimi na ho jain
Mizaj sabka juda hai, zara sambhal ke chalo
Safar bhi dhoop ka hai Adeel talwo'on ka
Har aik zakhm hara hai, zara sambhal ke chalo
(10 - April, 1997)
Hum aaftab se, dhalte hain kuch khabar hai tumhain
Khud apni aag main jalte hain kuch khabar hai tumhain
Jo sang toot na paye jahaa ki koshish se
Hamare gham se pighalte hain kuch khabar hai tumhain
Tabahion pe hamari jo kal talak khush the
Suna hai haath wo malte hain kuch khabar hai tumhain
Tumhari raah main aankhain bicha rhai the kabhi
Jo aaj raah badalte hain kuch khabar hai tumhain
Bulandio pe na dhondo ke johar-e-nayab
Zami'n ki goud main palte hain kuch khabar hai tumhain
Zamana jese behalta hai meri jaa hum bhi
Usi tarha se behalte hain kuch khabar hai tumhain
Hum aab-e-sem ki manind saari raat Adeel
Bina tumhare machalte hain kuch khabar hai tumhain
(17 - July, 1997)
(Amsterdam se Houston jate huwe)
Ishq sabr-o-raza ke rukh per hai
Ye safar karbala ke rukh per hai
Ek andhera zia ke rukh per hai
Chand mera ghata ke rukh per hai
Waqt aane pe toot jaye ga
Har sitara fana ke rukh per hai
Aik pal ki khabar nahin yaro
Har diya ya hawa ke rukh per hai
Nabaz-e-jaa dhemi hoti jati hai
Zindagi kia baqa ke rukh per hai
Phir se aye hain dosti ke payam
Guftagu karbala ke rukh per hai
Dil to pal bhar main moum ho jata
Zehan us ka ana ke rukh per hai
Jis se sekhe sabaq wafa ke Adeel
Aaj wo bhi jafa ke rukh per hai
(9 - November, 1997)
Baad az tamasha khail ke medan ki tarha
Hum ghar main hain bachay huwe saaman ki tarha
Hai aarzoo humain bhi koi khol kar parhai
Rakhe hain hum bhi taaq main juzdaan ki tarha
Dekhiye ajeeb hum ne laqab ke ye mujizaat
Pandit bhi bolne lage bhagwaan ki tarha
Paas-e-laqab zaroor hai ay ashraf-e-jaha
Insaan ho, basar karo insaan ki tarha
Dil main kisi ke kia hai khuda janta hai bas
Kia sab ke chehre parhte ho qura'an ki tarha
Lehja kaha se lao ge us ka miya Adeel
Ghazlain to likhte phirte ho, Irfan ki tarha
Irfan danish sikandari
Shikam ki aag bujhane yaha chale aaye
Kaha ke loug the hum sab kaha chale aaye
Wo loug ab kaha jin ki mizaj pursi ko
Zara si dair main hur-o-jina chale aaye
Khud apni aag main jalte hain hum jaha keliye
Waha pe doob gay jab yaha chale aaye
Humain na dhoondo ke ab hum na milsakain ge tumhain
Humare saath humare nisha chale aaye
Adeel is ka gila bhi karai to kis se karai
Haqiqaton ko sada di guma'n chale aaye
(16 - May, 1998)
Le aaye hum ko qafla salar kis taraf
Jana kaha tha aagaye hum yar kis taraf
Kuch bhi chupa nahin hai sabhi jante hai ye
Chhup kar gali main jate hain sarkar kis taraf
Kis jaa usay utarain subukdosh kese ho
Le jaain ab hayat ka ye baar kis taraf
Bas ye dua hai jald mile manzil-e-hayat
Parwa nahin, hai saya-e-diwaar kis taraf
Dehliz ghar ki chhori to ye souchna hi kia
Le ja rahi hai garmi-e-raftar kis taraf
Gull gasht se aabla paoon ka kia elaaj
Aawaz de, aye wadi-e-purkhar kis taraf
Kal tak jo takht -o- taaj main mere sharik the
Batla rahe hai aaj wo hai daar kis taraf
Tareekh parh ke dekho zara ahl-e-jah ki
Sar kis taraf gire, gai dastaar kis taraf
Ab zabt w ehtiyat ki himmat nahin Adeel
Jaaye na jane lehja-e-guftaar kis taraf
(15 - September, 1998)
Bas hataili pe jaan hai sahab
Zindagi, imtehan hai sahab
Sekro dost, sekro dushman
Or chhoti si jaan hai sahab
Kal yaha aaye, kal ko jana hai
Sirf ye daastan hai sahab
Aadam -o- hawwa se howa aaghaz
Aik he khandan hai sahab
Barishon ki dua kare kese !
Jis ka kacha makan hai sahab
Woh mere man main youn samaya hai
Khud per is ka guman hai sahab
Kitni talkhi hai is ke lahjay main
Kitni meethi zaban hai sahab
Hai sukhan roshni tu phir kese
Roshni bezaban hai sahab
Apni qismat kaha hai purkhon si
Ghar nahin ye makan hai sahab
Ham se jo ban para kia hum ne
Ab khuda pasban hai sahab
Koi toofa'n zaroor aaye ga !!
Aaj wo meherban hai sahab
Aik awaaz aarahi hai Adeel
Jaan hai tu jahaan hai sahab
(May, 2000)
Hain safr main roz o shab hum, humain kuch khaber nhi hey
Ye sitm hey sath wo hain jinhen kuch khaber nhi hey
Jo chaley the suaemanzil wo bhatak rahey hain ban main
Koi hey jo hum ko tokey,humain kuch khaber nhi hey
Jo hain ba khaber yahan per wo hain khuf main bhanwar ke
Wohi nakhuda hain apney,jinhain kuch khaber nhi hey
Jinhai elm e do jhan tha, wo nhi hain ab jhan main
Wo jo sans ley rahey hain unhain kuch khabar nhi hey
Jo dikha raha tha rsta, wo charagh bujh gya hey
Kahan therey karwan ab, humain kuch khabar nhi hey
Aye Adeel un se keh du ke sab aaina hai hum par
Jo yaqeen kar chuke hain, Hamain kuch khaber nhi hey
(May, 2000)
Apne Rasm-o-Rivaj kho bethey
Baaqi ab khaandaan main kia hai
(June, 2008)
Copyright © Adeelzaidi.com | All Rights Reserved