Ataa-e-ahl-e-baseerat Azan-e-Majlis hai
Nabi ke ghar ki inayat Azan-e-Majlis hai
Sada ye Zainabi Khutbon se Aarahi hai Adeel
Baqa-e-Dee'n ki Zamanat Azan-e-Majlis hai
Jazba-e-Eema'n Jagane Majlison mai Aaiye
Gul Muwaddat ke Khilane Majlison main Aaiye
Khud ko Roh-e-Huryat main Dhaalna ho jab Adeel
Shakhsiyat ko Hur banane, Majlison main Aaiye
Mere Afkaar jo Parhte hain Muwaddat ki Namaz
Ik Natija hai isi ka ye "Azan-e-Majlis"
Di hai Mehrab-e-Sukhan se jo tere Dil ne Adeel
Zikr-e-Akbar ka hai Sadqa ye Azan-e-Majlis
Hata ke gard-e-zamana nikhar de Mujh ko
Jahan Sa'nwar'ne waale Sa'nwaar de Mujh ko
Zarooraton ke bha'nwar hain, bauhat Andhera hai
Zara si roshni de kar ubhaar de Mujh ko
Sarab-e-jan ko jaha'n ki chamak samajhte rahay
Raha woh rooh main, hum jism tak samajhtay rahay
Pata chala ke woh khak-e-Haram ki khushboo thi
Ke jis ko sajde main gul ki mehak samajhtay rahay
Ajab thi kefiyat-e-jaa'n, tawaf ke dora'n
Hum apne aap ko rashk-e-malak samajhtay rahay
Khuda ko dhoondne ka kab humain khayaal aaya
Hum apni zaat ko us ki jhalak samajhtay rahay
Hasee'n waqt guzaara Khuda ke ghar main Adeel
Zameen thi zair-e-qadam, hum falak samajhtay rahay
Jab Nabi aae andhera mit gaya chaya huwa
Jehel ke Sehra main Noor-e-ilm ka Saya huwa
Jo kaha Rab ne, wahi hai Qoul bhi in ka Adeel
Mustanad hai Ahma-e-Mursal ka farmaya huwa
Zeenat-e-Kaaenaat tum se hai
Ya Nabi Kul Hayat tum se hai
Aalam-e-bay Sabaat hai har su
Mere Dil ko Sabaat tum se hai
Keh rahe hain Hira kay ye jalwe
Din ki Soorat bhi raat tum se hai
Ilm ka maktab-e-amal tum ho
Deen or Deenyat tum se hai
Woh Ali hai ke jis ka taaba abad
Choli daman ka saath tum se hai
Keh raha hai ye aaeena-e-Ballagh
Dehar main Rab ki baat tum se hai
Sub tumhara karam hai aey Aaqa
Aasiyo ki nijaat tum se hai
Karbala or Furaat se tum ho
Karbala or Furaat tum se hai
Tum ne Dukhtar kushi ko khatam kia
Jahiliyat ko maat tum se hai
Aaj dunya main Qaaim-o-Daaim
Farz-e-Soum-o-Salaat tum se hai
Mere afkaar par, Khuda shahid
Karam-o-Iltefaat tum se hai
Na'at go hai Adeel bhi lekin
Mo'atabar es ki zaat tum se hai
Ameen-o-Sadiq-o-Kaamil hain Muøstafa ke Laqab
Alif bhi Laam bhi Yaseen bhi Khuda ka Rasool
Woh Gup Andheron main Iqra ka noor le Aya
Dua-e-Hamd bhi, Aameen bhi Khuda ka Rasool
Hai is mehfil ka maqsad, zikr phelana Muhammad ka
Yaha'n aaya hai jo bhi, hai woh Deewana Muhammad ka
Koi Makhlooq lamha bhar ko bhi ghaafil nahin un se
"Zaban-e-Khalq par jaari hai afsana Muhammad ka"
Hazaron Ambiya peghaam e Haq le kar yahan aae
Magar hai maqsad e aamad judagana Muhammad ka
Jahannam main woh jal jaae ga ba'ad-e-hast- e- faani
Nahin jo mehfil -e- dunya main parwana Muhammad ka
Ajab Mafhoom- e- Hijrat de gaya tareekh ko, logo
Woh Makke se cooch kar jana Muhammad ka
Unhain meraaj ki batain bhala kese bataain hum
Samajh paae na ab tak jo waha'n jana Muhammad ka
Ameer e Kaaenaat- e- Ahl e Dil hoga wahi Insaa'n
Jo apnaae ga andaaz -e -ghareebana Muhammad ka
Luta kar maal-o -Zar apni kamaai ka, Ghareebon main
"Ameerana ada hai" Nan-e-Jau khana Muhammad ka
Rahi doran-e-faqa bhi, jo sheeri'n guftugu jaari
Ghareebi main bhi lehja dekha shahana Muhammad ka
Jo chaho Sehat-e-kirdaar. Aao sooe Aashoora
Zamin-e-Karbala par hai shafa khana Muhammad ka
Kabhi main, is ko ek sacha musalmaa'n keh nahin sakta
Na bhaya jis bashir ko hukm farmana Muhammad ka
Hamain batla gaya, Dunya ki qadr-o-manzelat kia hai
Rah-e-dunya-e-faani se gazar jana Muhammad ka
AÏdeel E'ezaaz hai, khoosh qismati hai, Ne'amat e Rab hai
Mere dil main meri saanson main bas jana Muhammad ka
Tum har ek qaul-e-Nabi kaanon se sunte aae ho
Phir bhi zati faaide ki baat chunte aae ho
Tum ko kia maloom kia hai khushboo-e-gul, jab ke tum
Daman-e-fikr-o-nazar main khaar bunte aae ho
Hamara Deen bhi eeman bhi Khuda ka Rasool
Zabaan-e-Rab bhi hai Qura'an bhi Khuda ka Rasool
Kitaab-e-Pak bhi Juzdaan bhi Khuda ka Rasool
Khuda ki shaan bhi pehchan bhi Khuda ka Rasool
Raheem-o-Jalwa e Rahman bhi Khuda ka Rasool
Keh Adal -o- daad ki meezan bhi khuda ka Rasool
Jo souchain, souch ki woh Had hai siwa lekin
Jo samjhain manzil-e-aasaan bhi Khudaka Rasool
Diya jo hukm, to pehle huwe amal pera
Amal badosh bhi farman bhi Khuda ka Rasool
Watan hai arsh, to phir arsh par ye Rab jaane
Khud apne ghar main hai mehmaan bhi Khuda ka Rasool
Isi se farq hai qaaim maiaan'e Baatil-o-Haq
To asal-e-farq bhi, Furqaan bhi Khuda ka Rasool
Adeel hum sa na Insaan ye raaz samjhe ga
Khuda ka noor bhi insaan bhi Khuda ka Rasool
Aap jo mere nigehbaan hain Rasool-e-Arabi
Manzilain sub meri Aasaan hain Rasool-e-Arabi
Aap ko dekh ke pehchaan hoi Yazda'n ki
Aap hi soorat-e-Yazda'n hain Rasool-e-Arabi
Aap ke natq-o-amal ka howa Qura'an mohtaaj
Bilyaqee'n bolta Qura'an hain Rasool-e-Arabi
Wajhe takhleeq-e-do aalam hi nahin Aap ki zaat
Kun ki tafseer ka unwaan hain Rasool-e-Arabi
Aap ki zaat ne bakhsha hai do aalam ko waqar
do jahan Aap pe qurbaa'n hain Rasool-e-Arabi
Aap ke ba'ad zamee'n phir hoi sede zulmat
Kitni zanjeerain hain, zinda'n hain Rasool-e-Arabi
Aap ne jis pe masawaat ki bunyaad rakkhi
Qaabiz us geti pe shahaan hain Rasool-e-Arabi
Aap ne tora tha jin zehno'n ka iqr'a se sukoot
Phir woh khamoush hain, be ja'n hain Rasool-e-Arabi
Hum se kehti hai ye kam' maaaegi Khud apni Adeel
She'r kab Aap ke shaya'an hain Rasool-e-Arabi
Maghferat ke phool chun'ne Majliso'n main Aaiye
Aanso'onke haar bun'ne Majliso'n main Aaiye
Arsh ki meraaj ko pesh-e-nazar rakh kar Adeel
Farsh ki me'araaj sun'ne Majliso'n main Aaiye
Nabi ki rah main ghaflat ko apnaya nahin karte
Madine aake ashiq lout kar jaya nahin karte
Yahi hai Ishq ka mazhar, wafadari ka pemana
Chalan hum dushman-e-Ahømad ka apnaya nahin karte
Waha'n jana to kia, us simt se rukh pher lete hain
Jaha'n jane ka Aøaqa hukm farmaya nahin karte
Yehi batla rahi hai zindagi Salæman-o-Buæzar ki
Nøabi waale kabhi gardish se ghabraya nahin karte
Raøsool Allah par Qurba'n jo ho jaate hain parwaane
Woh es iqdaam par har giz bhi pachtaya nahin karte
Guzarta hoon fana ki dhoop se main ya Nøabi keh kar
Ye kese maan loon mere Nøabi saya nahin karte
Nabi ki A®al ka, Ne'amato'n main karke tazkera shaamil
Nabi ka zikr phelate hain, simtaya nahin karte
Munawwar hai mera dil madhe Aøaqa ki tajalli se
Jabhi to paas mere waswase aaya nahin karte
Ghate jis se qad-e-wasf-e-Muhammad, esi ne'amaton ko
Adeel apni zaban par hum kabhi laaya nahin karte
Woh Nabi aakhri hai sahib-e-Qura'an hai
Jo wajood-e-kibriya ki mustanad pehchan hai
Ye fazilat khana-e- daawar ko bhi kab hai naseeb
Parwarish gah-e-peghambar khana-e-Imran hai
Do hi Moula hain Khuda ke ba'ad Ahmad or Ali
Hai yahi Islam mera or yahi eeman hai
Manzil-e-Irfan-e-Moula tak pohanchne keliye
Sub se behtar pairvi Buzæar-o-Salman hai
Sahib -e- Nehjul Balagha ki mohabbat hai neha'n
Kitna pakiza ye mere qalb ka juzdaa'n hai
Jis pe ho tehreer madh -e- dushmanan -e- Ahle Bait
Esa Qirtaas -e- Sukhan, lafzo'n ka qabrastan hai
Waqf hoon main midhat e Aal -e- Payambar par Adeel
Mujh pe ye naslan mere Rab ka bara Ehsaan hai
Shab-e-Tareek ho, mushkil ho, Dua yaad na ho
Ya Ali kehte raho fasl-e-sehar hone tak
Rizm-e-Jan main beshtar rah-e-Safar ke loug thay
Khair ke to kam, ziyada khu-e-shar ke loug thay
Aik bhi thera na medan main ye such hai ae Adeel
You'n tu kehne ko bohat woh karrw far ke loug tha
Majal thi hi nahin phir maqal kia karte
Woh Ahl-e-Ilm se koi sawal kia karte
Nazar utha ke na Ahle Kisa ko dekh sake
Ye Panjetan se koi qeel-o-qaal kia karte
Thay Panch noor muqaabil main ahle nijra'n ke
Tu mushrekeen-o-raonat khisaal kia karte
Mubahile ko jo nijrani aae, jhoote thay
Ta'aluqaat woh Haq se bahaal kia karte
Sawaal karne se pehle hi ghutne taik diye
Ye Panjetan ka tha Ro'ab -o- Jalaal, kia karte
Ghire huwe thay andhero'n main jab ke nijrani
Kaha se Rab ka woh laate jamal, kia karte
Siwa-e-sar jhukaane ke apna, Souchain zara
Nabi thay rubaru or un ki Aal, kia karte
Qusoor Khud ka tha, Takra-e-Haq ke jalwo'n se
Shikast khai tu is ka malaal kia karte
Na hote Panjetan-e-Pak se agar mamdooh
Adeel Shaairi phir bakamaal kia karte
Thi jis ke zikr pe bhi rok thaam chaar taraf
"Usi ke naam Durood-o-Salam chaar taraf"
Woh tau hai mazhar-e-Khaliq, jise madad ke liye
Pukaarte hain sabhi khaa-o-aam chaar taraf
Kaheen bhi hum ho'n, magar ban ke saya-e-Rahmat
Hai saath saath hamara Imam chaar taraf
Alag hai Nehje Ali ke, Baleegh Khutbo'n ki
Jabhi to phela Ali ka kalaam, chaar taraf
A®li ke naam se mushkil ho hal, to kia hairat
Hai mushkilat ki rad in ka naam chaar taraf
Asar Nabi ki Dua ka hai or karam Rab ka
Hain har jagah pe Ali ke Ghulam chaar taraf
Zameen-o- Mehar-o-Ma-o-Anjum-o-Falak kia hain
Ali ki arsh pe hai dhoom dhaam chaar taraf
Talab ho kiyou'n ma'e dunya, jab ke hai maloom
Lutainge Khuld main Kousar ke jaam chaar taraf
Nishaniyan jo batai gaeen, hoeen woh ayaan
hai un ke aane ka ye ahtemaam chaar taraf
Hamari qoum bhi aage barhay taraqqi main
barhain kabhi to hamare bhi daam, chaar taraf
Sana Imam ki likhne ka mo'ajiza hai Adeel
Jo Aaj tera hai dunya main naam chaar taraf
Ali hai Naam, na phir bhi khuda kahai'n us ko
Adeel dard-e-jaha'n ki dawa kahai'n us ko
Khuda ki tarha Rasoolo'n ke kaam bhi aaya
Khuda ka Hukm hai, Haajat rawa kahain us ko
Jaago, Tulu'e Mehar-e-Imamat ka waqt hai
Wajh'e Khuda Ali ki Ziyarat ka waqt hai
Ghar main Khuda ke Noor-e-Khuda ka, huwa zahoor
Kitna Azeem Eid-e-Musarrat ka waqt hai
Kabe ki simt karke jabeen Kam, ba e'ateqaad
Izhaar e Hub-e-Shah-e-Wilayat ka waqt hai
Aaya jahan main Aøhmad-e- Mursil ka janashi'n
Is Hukm-e-kibriya ki isha'at ka waqt hai
Lo, Aagaya jis'e hai shafa'at ka ikhteyar
Ae momino dua-e-shafa'at ka waqt hai
Karke wazoo, Mohabbat-e-Haider ke Aab se
Utho chalo namaz-e-ita'at ka waqt hai
Phir sar utha rahi hain yazeedi jama'atain
Ya Mehdi aaiye ke hidayat ka waqt hai
Dehshat gari ki zad pe hain imlaak-e-deenvi
Shee'aan-e-Mur®taza pe qayamat ka waqt hai
Masmaar ho rahi hain masajid har aik su
Jo dhaa raha hai us pe ye la'anat ka waqt hai
Khamoshiyo ka saaz karo band momino!
Rah-e-amal main Buæzari hikmat ka waqt hai
Kijiye AÏdeel Ya Ali keh kar rawa'n qalam
Ye Shaairon ke waaste midhat ka waqt hai
Jo pervi main Ali ki, qadam jama ke chale
Woh aandhiyo ke muqabil bhi sar utha ke chale
Adeel un se ye kehdo, jo hain Ali ke Udu
"Charagh le ke kaha'n saamne huwa ke chale"
Az Ibteda zaban pe hai Haq, Ya Ali Madad
Laya hai saath dil ka warq, Ya Ali Madad
Mera lahoo na bhoole ga Ehsaan ye Adeel
Maa'n ki ata hai pehla sabaq Ya Ali Madad
Midh-e-Ali na ho jo Sukhan ke nisaab main
Reh jaae ghut ke nazam ka darya hisaab main
Tafseer keh rahi hai, samajh kar to dekhiye
Rooh-e-Baya'n A®li hain Khuda ki kitaab main
Shaamil Ali ke ishq ka sarmaya ho agar
Aae kami na dolat-e-ajar-o-sawab main
Hum or munkiraan-e-Ali ka juda hai zouk
Abr'e karam main hum, to woh gum hain saraab main
Hub-e-Ali ghuloo hai, to shamil karain janab
Esa har ek gunaah hamare hisaab main
Tab baat hamsari ki karain hum se nukta chee'n
Pehle kisi ko laaen Ali ke jawab main
Jis ki nazar ne Manzar-e-Khum ko bhula diya
Mujrim hai chashm-e-ada-e-Ris®alat Ma'aab main
Zikr-e-Wali-e-Rab se kia jis ne Ijtenaab
Woh Dil hamesha gharaq raha Izteraab main
Haq chheena hai jinho ne A®li o Batool ka
Ho'n ge woh mubtela Sar-e-Mehshar azaab main
Sun kar mera kalaam ye kehte hain sub Adeel
"Mashghooi- e-Haq hoon bandagi-e-Buturaab main"
Moula-e-Kaaenaat se Aai hai jang ko
Kis darja aaj Khalq-e-Khuda past hogai
Baato'n se baat jab na bani, uthi Zulfiqaar
"Pi Pi ke maikasho'n ka lahoo mast ho gi"
Haq ke Unwaan ko samajhne Majliso'n main Aaiye
Deen-o-Eema'n ko samajhne Majliso'n main Aaiye
Rehal par rakkha na reh jaae kahi'n Qura'an, Adeel
Rooh-e-Qura'an ko samajhne Majliso'n main Aaiye
Qibla Ali, Imam Ali, Muqtada Ali
Juz Mustafa-o-Rab, hain har ek se siwa Ali
Mushkil main hai agar, to Ali ko Pukaar le
Mushkil main kaam Aaen ge Mushkil Kusha Ali
Namrood har zamaane ka gumnaam ho gaya
Fakhr-e-Khalil aaj bhi hain Murtaza Ali
Qura'an se ya Ghadeer ke maida'n se pooch lo
Moula-e-Kaaenaat Muhammad hain ya Ali
Doobe fana ki khaai main sub munkir e A®li
Phela rahai hain aaj bhi Noor-e-baqa Ali
Sunte hi jis ko, hoti hain khud mushkilain faraar
Woh naara Ya Rasool hai ya naara Ya Ali
Rukh haath, Aankh, Nafs, Nazar sub Khuda ke hain
Phir bhi hai kufr kehdoon agar main, Khuda Ali
Do naam Rab ko sub se ziyada Aziz hain
Ek naam Mustafa hai to hai doosra Ali
Lashkar ka qalb cheer ke hota hai jo shaheed
Tamgha tumhaare naam ka milta hai Ya A®li
Phir dekhna Adeel ataao'n ki barishain
Tum aik baar dil se pukaaro to Ya Ali
Hijrat ki shab Imam ka sona bata gaya
Mansab juda hain phir bhi Nabi se juda nahin
Rukh, haath, aankh, nafs ye kehte hain ae AÏdeel
Saari Khuda ki shaan hai lekin Kuda nahin
Hai Yehi qoul-e-Nabi Fikr-e-Rasa ke saamne
Sub Sifar hain zikr, zikr-e-Murtaza ke saamne
Ya Ali keh kar gazar jaaen ge har manzil se hum
"Mushkilain kia cheez hain Mushkil Kusha ke saamne"
Ho gae finnaar sub, jo bhi muqabil aae the
kon th'ehra jang main, Shair-e-Khuda ke saamne
Kar sakain ge kia ata dunya ko qaroon-e-jaha'n
har ata hai, heech shah-e-hal ata ke saamne
Kar diya tareek zehno'n ko munawwar Ilm se
Kia hai sooraj Ilm ke dar ki Zia ke saamne
Qabar main mujh se nahin woh kar sake koi sawal
Jhuk gae dono'n farishte Murtaza ke saamne
Koun hai ba'ad-e-Nøabi Misl-e-Ali soucho Adeel
Koun Misl-e-Murtaza tha, Mustafa ke saamne
Hamare dil main faqat Pa®njetan ka Dera hai
Ab or kis ki bhala hum ko justaju hogi
AÏdeel, Wird-e-Zabaa'n hai Ali ka naam sada
Isi Wazife se takmeel Aarzoo hogi
Fehm-o-Danish ka mukammal iste'ara ho gaya
Murtaza se munsalik Islam saara hogaya
Wo balaghat Ilm ki seekhi Rasool Allah se
Jo kaha Nehjul Balaagha ka woh paara ho gaya
Aagaya dar par khuloos-e-dl se jo tere Naseeb
Aasmaan-e-Dee'n ka woh roshan sitara ho gaya
Mushkilo'n ke waqt jab Naad-e-Ali main ne parhi
Be sahaara tha, Madad pohnchi, Sahaara ho gaya
Ya Ali naara tha Aslan to Muhammad ka, magar
Faiz se Aaqa ke, ye naara hamara ho gaya
Jis ke Moula Mustafa hain us ke Moula Mu®rtaza
Bhoole tum or hum na bhoole, Aashkara ho gaya
Sone ke badle Kharida, Ikhteyaar-e-Kibriya
Mere Moula ka Do Aalam par Ijaara ho gaya
Jis ki Saanso'n ne kiya Bait-e-Saqifa se guraiz
Us ke Bait-e-Bakht ka roshan minara ho gaya
Har bhatakti mouj ko, Saahil nahin milta Adeel
Ya Ali jis ne kaha us ka kinara ho gaya
Jo un ke qadmo'n se uttha ghubaar de mujh ko
Jaha'n se guzre the Moula. Guzaar de mujh ko
Main un ki Khaak jo chhooloon to tujh talak pohnchoo'n
'Urooj ae mere Parwardigaar de mujh ko'
Na Samjha ye zamaana kia Ali hai
øNabi ki tarha se Moula Ali hai
Shab-e-hijrat yehi farmaya Rab ne
"Nabi ka janashee'n mera Ali hai"
Tumhain shak ho, to ye kaabe se poochho
Buto'n ko torne waala Ali hai
Imam dee'n, Naseeri ka Khuda bhi
Nahin wesa koi, jesa Ali hai
Ho jis ki zaat par dhoka Khuda ka
Zamaane bhar main woh tanha A®li hai
Natija hai ye khidmat or wafa ka
Nabi ke qalb par chhaya Ali hai
Suno or maano is qoul-e-Nabi ko
Woh shehr-e-Ilm, Darwaaza Ali hai
Baseerat ki nazar se dekho yaaro
Rasool-e-Pak ka saaya Ali hai
Kisi ko maan loo Haq kiyou main, jab ke
Raøsool-o-Rab ne farmaya Ali hai
Adeel apnaao kiyou'n kar main ye dunya
Ke mere dil ki to dunya Ali hai
Jo har qadam pe dhaal bana hai Rasool ki
Wo zaat-e-Murtaza ke siwa or koun hai?
Jis ne lahoo se seencha shajar deen ka Adeel
Aulaad-e-Mustafa ke siwa or koun hai?
Deen par Moula ki hain ye ulfatain apni jagah
In ka Haq, In ki Khuda se nisbatain apni jagah
Koi in ko maqsad-e-Haq se hata sakta nahin
Ba Hasham hain ye, to in ki Hashmatain apni jagah
Sar bulandi is ko kehte hain, sunain zulmat ma'ab
Kat gae hain sar magar hain qamatain apni jagah
Zindagi roze main guzri jab, mila bas naan-e-jau
Hain magar Moula Ali ki taqatain apni jagah
Jaan ki parwa na karna or sona ek taraf
Reh gaee'n baatil ki saari quwwatain apni jagah
Dushmani kar ke Nabi ki Aal se paaya na kuch
Ahle zulmat ne uthaee'n zillatain apni jagah
Poochhna un ka Nabi se, Haq pe hum hain ya nahin
Saazisho'n main thein neha'n ye qurbatain apni jagah
Zor se talwaar ke kalme to parhwaae bohat
Reh gaee'n sub deen ki ye d'awatain apni jagah
Marg-e-wehshat ban gaya ro'ab-e-Ali Murtaza
Jang-e-Khaiber main Ali ki zarbatain apni jagah
Zikr-e-Moula har tariqe se nibhana chahiye
Shaairi main shaairo'n ki jiddatain apni jagah
Chappe Chappe par hai jaari aaj bhi zikr-e-Hussain
Kar rahi hain un ka gham ye millatain apni jagah
Rif'at-e-Mimbar mili mujh ko Adeel is bazm main
Fazal-e-Moula mehfilo'n ki rif'atain apni jagah
Panje main tere taqat-e-das- e-Khuda Ali
Chehre pe tere Husn baham hai Rasool ka
Misra ye Josh ka na parhoo'n kiyou yaha'n Adeel
"Too haath hai Khuda ka qalam hai Rasool ka"
Diya jo kun ka Azal se jala Ghadeer ke naam
To kiyou na karta khudaai Ghadeer ke naam
Khuda-e-Pak ne takmeel-e-deen kar ke Adeel
Phir intesaab kiya deen ka Ghadeer ke naam
Aakhri Nabi ne de dia Khutba Ghadeer main
Ha®ider bana diye gae Moula Ghadeer main
Gumnaam sa tha Kutba, bana rashk e do jaha'n
Esa mila Ghadeer ko rutba Ghadeer main
Man Kunt rakh ke Khutbe ka unwaa'n Røasool ne
Qura'an ka sunaya khulasa Ghadeer main
Jo ban sakain na shah-e-wilayat, bahukm-e-Rab
Un hasrato'n ka utha janaza Ghadeer main
Hamrah laya mout woh haris ke waaste
Patthar jo Aasmaan se utra Ghadeer main
Is tarha se Nabi ne A®li ko kiya buland
Utra munafeqin ka chehra Ghadeer main
Jo ke makeen thi dil-e-fitteen main Adeel
Matti main mil gai woh tamanna Ghadeer main
Payaam Aya hai tera, teri reza pe nisar
Rasaai-e-Sheh-e-duldul sawar de mujh ko
Elaahi kar de ata mujh ko quwwat-e-Parwaaz
Jo ho sake to Najaf main utaar de mujh ko
Wasaf e Haider main na Khud saakhta jumla kahiye
Jo Payamber ne kaha, bas woh Khudara kahiye
Jo bhi nijraniyo'n ke madd-e-muqaabil ho'n kahin
Bola Qura'an e Mubeen un ko hi sachcha kahiye
Tazkera Ahmad-o-Haider ka he laazim sub par
Jo gareza'n hai usay uqal ka kuchcha kahiye
Jis ne kul kaam kiye Rab ki jagah, Rab ki tarha
Mazhar-e-Rab na use kahiye to phir kia kahiye
Lafata Aaya yahi kehta huwa suay Nabi
Azm-e-Haider ko mashiyat ka arada kahiye
Ho kisi maslak-o-mazhab se ta'alluq us ka
Ya Ali js ka hai naara usay apna kahiye
Chahe wo ghair sahi, Haq ko jo kehte hain Ali
"Zaib deta hai unhain jis qadar achcha kahiye"
Baadshaho'n ki kabhi maddah nahin likhi Adeel
Mujh ko bhi Misl-e-Farazdaq Sukhan Aara kahiye
Koshish karo Ali ki fazilat main ho kami
Kuch loug hain faqat ye arada kiye huwe
Par, Kul sifaat e Rab jo hain to Haider ke siwa
Un sub ka Murtaza hain ehaata kiye huwe
Hai zikr un ka, Jo Rab ke hain Tarjumaan -e- karam
Jo goush-e-fikr main dete rahai Azan -e- karam
Har ek qabile main dhoondne, na mil sake lekin
Mile qabila e Hashim main Sahiban-e-karam
Muhammad-o-Ali-o-Fatima se ta Mahdi
Sitam ki dhoop main ye sub hain Sahiban -e- Karam
Karam ka Ghasib-o-bay dee'n se kia ta'alluq hai
Hain jab ke Aal e Nabi meer-e-Karwaan-e-karam
Ye Baat arsh ke parde se chhan ke aai hai
Jo hai zaban-e-Khuda bas woh hai Zaban -e- Karam
Khuda ka shukr Hasan aagae jahan main aaj
Khud apni zaat main naslan hain ye Jahan-e-Karam
Hasan ka kiyou na ho lab par mere Bayan -e- Karam
Hasan ke naam se mehka hai Gulistan -e- Karam
Makaan or bhi kaafi thay aas paas, magar
Bas ek makaan Hasan ka tha, Aastaan-e-Karam
Barhe agar suay saahil jo Ya Hasan keh kar
Safina paar laga dainge Baadbaan-e-Karam
Wo chahta to amal kar ke banta naik bashar
Ameer-e-Shaam ko thi Sulah ek Nishaan-e- Karam
Qadam qadam pe kaha seerat -e- Hasan ne, Adeel
Ke khandaan-e-Muhammad hai Khandaan -e- Karam
Kia Kia Hasan ke wasf ye Haq ko qabool hain
Ba Ba Wali-e-Rab hain to Madar Batool hain
Bhai Imam, Baap Imam Aap bhi Imam
Hadd-e-sharf tu ye hai ke Nana Rasool hain
Such baat kehne se tumhain kiyou'n ijtenaab hai
Kirdaar-e-Meer-e-Sham badi ka nisaab hai
Zahra ka chaand pehla yahi hai, jo sar basar
Aaina-e-Jamal-e-Rukh-e-Buturaab hai
Kiyou maante nahin jo haqiqat hai saamne
Aal-e-Nabi na ho'n, to ye dunya saraab hai
Irfan nahin hai baara ka, lekin ye hai yaqeen
Jo bhi mera I®mam hai woh lajawab hai
Zikr-e-Ameer-e-shaam hai sub se bara gunah
Moula Hasan ka tazkera rooh-e-sawab hai
Kar le Muaaviya, ye ghalat fehmi apni door
Khaaif Imam us se ho'n ye is ka khawab hai
Kya Takht-o-Taaj, dam main ulat de zameen ko
Ye shair dil Hasan, Khalf-e-Buturaab hai
Be'at karo Imam ki, or es Yaqeen ke saath
"Khulq -e- Hasan se deen -e- khuda kamyaab hai"
Aae farishte qabar main to main ne ye kaha
Shaair hoo'n Mujtaba ka, ye mera hisaab hai
Ese ye Bahr-e-ilm-e-Imamat hain ae Adeel
Un ke to roobaroo ye samandar Hubaab hai
Midh-e-Hasan main ye mere lab par kalaam hai
Beta Ali ka pehla ye, Doyam Imam hai
Aaya hai hal ata yahi kehta huwa Adeel
"Zahra ka chaand Zeenat -e- Mah -e- Sayaam hai"
Youm-e-Ghadeer ki yahi peham pukaar hai
Ba'ad-e-Nabi ®Imam hi ba ikhteyaar hai
Ba'ad-e-Ali Khiza'n ne ye thak haar kar kaha
Kirdaar ke chaman main H®asan se bahaar hai
Khairaat-e-Sulha le ke bhi is ko hai izteraab
Lekin Hasan ke rukh pe sukoo'n ka nikhaar hai
Sulha-e-Muhammadi ki ye kehti hai roshni
"Sulh -e- Hasan se deen -e- Nabi ka waqaar hai"
Takht-e-Shahi ki es ko zaroorat nahin koi
Jis ka dilo'n pe misl-e-Ali iqtedaar hai
Be dee'n hai woh, kare jo baghawat ®Imam se
Qura'an ki bhi pukaar yehi bar bar hai
Radd-e-amal pe Sulha ki, kehti thi zulfiqaar
Ye to meri tarha se qalam ka bhi waar hai
Zulmat ki raah chhor de, or ja Hasan ke paas
Mit jaae ga jo aankho'n main shar ka ghubaar hai
Siffeen-o-Nehrwaan-o-Jamal se huwa a'ayan
Qismat main Khandaa -e Umayya ki, haar hai
Mere Lehad main Aain ge Moula-e-Kaaenaat
Deedaar un ka ho ga mujhe e'atbaar hai
Sun kar kalaam, bole farishte ke ae Adeel
Tera bhi Khaas Ahl-e-Sukhan main shumaar hai
Dekha Haseen ®Hasan ka jo rukh lala zaar ne
"Gul khil uthe, naqaab ulat di bahaar ne"
Tegh-e-qalam ki zarb thi kaari bohat Adeel
Dekha qalam ko rashk se you Zulfiqaar ne
Batla de kaash koi thikaana Imam ka
"Muddat se muntazir hai zamana Imam ka"
Is se A'yaan na kiyou Abuturaab ka ho sharf
Jesa Imam wesa gharana Imam ka
Batla gaya Nabi ko, ke un ka Wasi hai kaun
Bistar pe Hukm-e-Rab se sulaana Imam ka
Kitne diye Zameer-e-bashar main jala gaya
Woh dus ki Shab diye ko bujhaana Imam ka
Ilm-o-Amal se roshni phelaai deen ki
Qura'an ka Aaina hai fasana Imam ka
Allah jaane, kia hai ye taakheer ka sabab
Warna Atal hai dehar main Aana Imam ka
Allah ka hi kaam hai, ye maan lo Adeel
Insaa'n ko zulmato'n se bachana Imam ka
Chahta hai too jo farq-e-Khair or shar, dekhna
Chashm-e-dil se bughz ki ainak hata kar, dekhna
Ye sharf maida'n main haasil bas Bani Hashim ko hai
Barh ke aage phir kabhi hargiz na mur kar, dekhna
Marzi-e-Rab se Payamber, Hukm ye farma gae
Har musalmaan par hai waajib rooe Haider,dekhna
Hum Ali waalo'n ki qismat chamke gi Mehshar ke din
Bakhshwaane aaingi Bint-e-Payambar, dekhna
Ghaasibo'n par teera bakhti chhae gi roz -e- jaza
Barse ga esa utaab in sub ke sar par, dikhna
Suay dozakh jarahi ho gi gunehgaaro'n ki saf
Aage ho'nge Aal ke dushman, ye manzar dekhna
Hum ®Ali waale khushamad kiyou karain Rizwan ki
Ya ®Ali keh kar khule ga Khuld ka dar, dekhna
Pi lia jaam -e- shahadat misl-e-Hur jis ne Adeel
Muntazir us ka rahe ga Hauz -e- Kausar, dekhna
Na sirf ye, ke abad tak alam Hussain ka hai
ÏAdeel, saara wjood-o-adam Hussain ka hai
Ye Karbala ke ufaq se ubhar rahi hai sada
Jo hashar tak na mite ga woh gham Hussain ka hai
Sidq ki teh main utarne Majliso'n main Aaiye
Aagahi ki mashk bharne Majliso'n main Aaiye
Zindagi ka zabta Karb-o-Bala hai ae Adeel
Zindagi ki baat karne Majliso'n main Aaiye
Ghar se Shabbir andhero'n ko mitane nikle
Lo, Charagh-e-basharyat ki brhaane nikle
Haq-o-Batil main kabhi mail nahin ho sakta
phir yahi Dars-e-Nøabi sub ko parhane nikle
Aik hi le ke qayaam or safar ka maqsad
Waris-e-Khatm-e-Raøsul zehan jagane nikle
Zehan-e-Insaan ko dikhaana thi fana ki soorat
Jo munafiq thay naqaab un ki uthane nikle
Ye jo nikle suay maqtal to ajab shaan ke saath
Aadmi ko Hur-e-Zeeshaan banane nikle
Bujh gae rah main hi un ke charagh-e-hasti
Jo mowaddat ke charagho'n ko bujhane nikle
Jo Imamat ka taqaza tha, nazar main rakh kar
Shorish-e-Majlis-e-Shoora ko dabane nikle
Kasrat -e- foj -e- Yazeed -e- sitam aara ka ghuroor
Kul bahattar ki himayat se mitaane nikle
Wahi Moula -e- Jaha'n hai jo qaza ke ban main
Jab bhi nikle to diya Haq ka jalane nikle
Saath ku'nbe ko liye Fatima ke lakht-e-jigar
Ghar lutaane ko chale, Deen bachane nikle
Wa'ada-e-Tifli na bhoole thay Muhammad ke Pisar
Raahe Islam main sar apna katane nikle
Le ke humrah salam-e-shahe mazloom. Adeel
Ghar se apne esay Majlis main sunane nikle
Zindagi Shabbiriyat ki jawada'n Zainab se hai
Aabid-e-Beemaar ki himmat jawa'n Zainab se hai
Chal rahi hai Nabz-e-Dee'n khutbo'n ke dam se bilyaqeen
Majliso'n ka karwaa'n peham rawa'n Zainab se hai
Kufr Pehchana gaya, or mit gai shaan-e-Yazeedi
Kamyabi ki sanad ye imtehaan Zainab se hai
Beh gaya qasr-e-Yazeedi, Sabr ke sailaab main
Dehar main M'adoom zulmat ka nisha'n Zainab se hai
Karbala tak qafla pohchaya tum ne ae Hussain
Karbala se aage zinda, daastaa'n Zainab se hai
Nargha-e-foj-e-Yazeedi bhi, Aseeri bhi, magar
Himmat-e-Aal-e-Rasool-e-Do jaha'n Zainab se hai
Be kafan, be gor, Haq waale jo ban main so gae
Un ka qaaim maatam-o-aah-o-fugha Zainab se hai
Gardisho'n ki dhoop ki ahl-e-aza ko fikr kia
Rehmat-e-Khaliq ka sar par saebaan Zainab se hai
Naam lewa Mustafa ka koun hota Hashar tak
Deen-e-Ahmad ka zamane main nisha'n Zainab se hai
Hai behen ye ek Alam waale biradar ki. Adeel
Bas, esi nisbat se sar par saaeban Zainab se hai
Rakh ke nazro'n main baqa ko, Majliso'n main Aaiye
Raazi karne Mustafa ko, Majliso'n main Aaiye
Maqsad-e-Kalqat hamara hai, Aza Shabbir ki
Dene pursa Fatima ko, Majliso'n main Aaiye
Wallah Yadullah ki dua sub se alag hai
Abbas ki hasti bakhuda sub se alag hai
Ulfat ki bohat chaashni dunya main hai, lekin
Ae Hubb-e-Ali tera maza sub se alag hai
Jis ne bhi kia Baagh-e-Fidak ghasab, woh sun le
Zahra se adawat ki saza sub se alag hai
Haq baat pe jaanain to hazaaron hooin qurba'n
Par, ma'arka-e-Karb-o-Bala sub se alag hai
Ae Karb-o-Bala tere shaheedon main yaqinan
Ghaazi ka laqab jis ko mila sub se alag hai
Maana ke wafadar zamane main hain, lekin
Ab®bas-e-Dilawar ki wafa sub se alag hai
Yu'n to lare sub or shuja'at bhi dikhaai
Be taigh jo maida'n main lara, sub se alag hai
Tashbeeh na do es ko kisi taaj mehal se
"Abbas ke roze ki fiza sub se alag hai"
Hum bachcho'n ka you rakhte hain naam Aal-e-Nabi par
In naamo'n ki wiq'at bakhuda sub se alag hai
Hoo'n main bhi Adeel Aal ki midhat ka sazawaar
Dil ko hai Yaqeen is ki jaza sub se alag hai
Behr-e-Midhat, Taair-e-Fikr-e-Sukhanwar le gaya
Karbala se jur'at-e-Ghaazi ke manzar le gaya
Wasaf karne thay faqat Abbas-e-Ghaazi ke raqam
Yu'n qalam ko dil na as unwaan se hat kr le gaya
Jab barha saani-e-Haider mashk bharne ke liye
Taigh ke badle dua-e-bint-e-Haider le gaya
Kis ne dekhi sur'at-e-raftaar-e-usap baawafa
Fakhr -e- raf raf tha, woh Ghaazi ko far far le gaya
Fatah kar ke alqama jab qasd jannat ka kia
Chhor kar sub, saath apne ishq -e- Sarwar le gaya
Is qadar thi Aab-e-Khushnudi-e-Zahra ki talab
Khush honto'n ko su-e-tasnim-o-kousar le gaya
Daasta'n Ghaazi ki simta kar likhoo'n to ye likhoo'n
"Aik piyasa aake chilloo main samandar le gaya"
Ran main jazbaat -e- wagha ka kar ke gul roshan charaagh
Qalb main sham-e-wafadari jala kar le gaya
Hashr tak ke waaste, Paani se lab kar ke juda
Zabt or eesaat ke woh bhar ke saaghar le gaya
Kar dia be jaan, thokar maar kar aab-e-furaat
Zindagi ki mashk kaandhe par utha kar le gaya
Sajda karne ishq ka. Abbas ke dar par ÏAdeel
Mera jazba meri peshaani ko aksar le gaya
Raahe eemaani pay chalne, Majliso'n main Aaiye
Yu'n andhero'n se nikalne Majliso'n main Aaiye
Kia ajab hai jannati ban jaain hum maanind-e-®Hur
Apni taqdeerain badalne, Majliso'n main Aaiye
Ye kis ne kaha shar-e-jaza koi nahin hai
Haider ki mohabbat ke siwa koi nahin hai
Jab chhora watan, Adal-e-Khuda ne ye sada di
Buzar ki tarha sachcha khara koi nahin hai
Meesam yahi kehta hai tera nama-e-a'amaal
"Juz Hubb-e-Ali, Jurm-o-Khata koi nahin hai"
Koshish thi bohat baara Muhammad ke mitain naam
Choudah so baras beete, mita koi nahin hai
Woh koi bhi ho ma'arka, lekin sar-e-maida'n
Juz Sher-e-Khuda or Tika koi nahin hai
Shamsheer-e-Yadullah ki jo aagae zad par
sub hogae finnaar bacha koi hain hai
Ausaaf-e-Ali dekh ke, samajhe ye Nusairi
Bas ye hain Khuda, or Khuda koi nahin hai
Hai laaiq-e-ta'azeem kai jagho'n ki matti
Juz Karb -o- Bala Khaak-e-Shifa koi nahin hai
Shabbir tere gham pay buka dil ki hai zeenat
Lekin gham-e-dunya pay buka koi nahin hai
Rukh karke suay neher, ye chillaati thi ®Zainab
Abbas mere sar pa rida koi nahin hai
Ye bain Sakina ke thay aajao chacha jaan
Mujh ko talab-e-Aab-o-ghiza koi nahin hai
Ae dil kabhi dunya se mohabbat nahin karna
Dunya main bohat kuch hai. Wafa kaoi nahin hai
Kehte hain tere Sh'er, Adeel-e-Sukhan aara
Moula ke siwa dil main basa koi nahin hai
Apne seenay main basa lijiye Gham-e-Aal-e-Nabi
Or saaray gham bhulaane Majliso'n main Aaiye
Hum ne jo farsh-e-aza se dars seekha, wo Adeel
Apne bachcho'n ko sikhaane Majliso'n main Aaiye
Ata-e-Kibriya hai or main hoo'n
Dua-e-Fatima hai or main hoo'n
Pae Jibreel-e-Midhat, Bait'e Dil ka
Dar-e-Aamad khula hai or main hoo'n
Saf-e-Alfaaz hai, kaaghaz, Qalam hai
Ajab ye Takhliya hai or main hoo'n
Nahin Ehsaas-e-Tanhaai zara bhi
Koi dil main basa hai or main hoo'n
Na sajde se mujhe koi uthaae
Yaha'n mera Khuda hai or main hoo'n
Nahin ehsaas apne gham ka mujh ko
Khayaal-e-Fatima hai or main hoo'n
Tamanna-e-Nabi ki roshni main
Sana-e-Murtaza hai or main hoo'n
Nazar choukhat se uthti hi nahin hai
Dar-e-Mushkil Kusha hai or main hoo'n
Yaheen aana hai to phir kiyu'n main jaaoo'n
Yahaa'n Khak-e-Shifa hai or main hoo'n
Sar-e-Doush-e-Aqeedat har qadam par
Alam Abbas ka hai or main hoo'n
Furaat-e-Jaa'n hai or es ke kinaare
Wafaao'n ki fiza hai or main hoo'n
Yeh keh kar jhuk gae sajde main Sarwar
Mere Rab ki reza hai or main hoo'n
Khuda se kehta tha ye qalb-e-Abid
Tera bas aasra hai or main hoo'n
Adeel ab or kia mujh ko talab ho
Zameen-e-Karbala hai or main hoo'n
Jaawedaa'n ran main behtar thay qaza ke saamne
Le kar jana thay khuda waale khuda ke saamne
Kab Tike Ahl-e-Fana Noor-e-Baqa ke saamne
Jabr-e-Shaahi Kham howa sabr -o-raza ke saamne
Tifl bhi sarshaar thay shouq-e-shahadat se sabhi
Maao'n ne bheja tha yu'n himmat barha ke saamne
Lashkar-e-Shahi ne foran chhordi Nehr-e-Furat
Aagae Abbas jab parcham utha ke saamne
Faiz-e-Khoon-e-Sheh se sajdo'n ko masihaai mili
Keemya kia cheez hai Khaak-e-Shifa ke saamne
Es tarha Zainab ke khutbe se howa larza'n Yazeed
Jis tarha Khaibar main Marhab, Murtaza ke saamne
Ahle Koofa hashar main dekhainge khud apna ye haal
Dar Jahannam ka khule ga be wafa ke saamne
Jitne bhi toofan aae, bujh gae sub ke charaagh
Tergi ne tora dum Sham'a-e-Aza ke saamne
Dekh lena Roz-e-Mehshar, Maatmi Shabbir ke
Surkhroo ho'nge Janab-e-Syeda ke saamne
Sahib-e-Fikq-o-nazar har giz nahin karte Adeel
Qaisar-o-Kasra ki batain Karbala ke saamne
Jab Dar-e-Fatima main Aag lagi
Dushmano'n ki baqa main Aag lagi
Tapish-e-Tashnagi-e-Itrat se
Zalimo'n ki chita main Aag lagi
Mashk esi chhidi Sakina ki
Saahil'e alqama main Aag lagi
Bakht-e-Asghar tu phool ban ke khila
Qismat-e-Hurmala main Aag lagi
Nasal-e-Zehra ke khaime jal na sake
Shijra-e-Ashqiya main Aag lagi
Sabar ki Karbala main phool khile
Jabar ki Karala main Aag lagi
Sabar-o-Himmat ki Sho'alagi se Adeel
Sazisho'n ki ghata main Aag lagi
Kaa'np uthe jab but parasto'n par khula
Khana-e-Rab main naya ek dar khula
Liptay kul asnaam ke bistar, ke jab
But shikan ke azam ka bistar khula
Jo muqabil Murtaza ke aagaya
Ho gaya woh sar basar kaafar khula
Sub ne mil kar ki bohat koshish, magar
Pohnch'e Haider tab dar-e-khaibar khula
Jab ®Ali Shah-e-Wilayat ban gae
Deen kaamil ho gaya, sub par khula
Haajio'n ke saamne Roz-e-Ghadeer
Koun Moula hai Sar-e-Mimbar khula
Khutba-e-Aakhir se har insaan par
"Aqeeda-e-Ahkaam-e-Peghambar khula"
Jab dar-e-a'elaan-e-Khum wa hogaya
Koun hai ba'ad-e-Nabi Rahbar, khula
Naan-e-Jo kha kar bhi baab-e-Ilm ka
Saare aalam ke liye langar khula
Jab bhi soucha, ho raqam Karb-o-Bala
Chashm-e-Dil par dard ka daftar khula
Ho gaya pamaal Qasim ka badan
Or sina'n se seena-e-Akar khula
Sabr-e-Zain-ul-Abidin ki inteha
Ro-baroo un ke phoophi ka sar khula
Kaun hai mazloom, zalim kaun hai
Shaam ke baazar main aa-kar khula
Chehra-e-Sughra ki rangat urd gai
Us pe jab Hal-e-Ali Asghar khula
Khutba-e-Zainab se chashm-e-fikr par
Har yazeedi zulm ka manzar khula
Jab ye soucha karbala likhoo'n Adeel
Yak bayak afkaar ka daftar khula
Dekh kar hum ko jo woh tewar badalte hi rahay
Un ko es maatam ke sub andaaz khalte hi rahay
Aag par karte rahay Ahl-e-Aza maatam, Adeel
Or wo nafrat ke angaaro'n pe jalte hi rahay
Karbala, mout ko Aaghoush-e-Baqa deti hai
Ta abad Haq ke shaheedo'n ko jala deti hai
Karbala, Jage huwe fitne sula deti hai
Karbala, suay huwe Hur ko jaga deti hai
Ye Me'araaj-e-Mohabbat, koi wapis na gaya
Shamm'a gul kar ke Imamat ye dikha deti hai
Sar bulandi keliye deen ki, Yom-e-Aashoor
"Bhai sar deta hai, Hamsheer rida deti hai"
Mit gaya naam-o-nisha'n tak, tere qatil ka Hussain
Karbala, jabar ko esi hi saza deti hai
Keh raha hai yahi Zainab ka she'aar-e-mohkam
Karbala, shaam ko bhi noor-e-wafa deti hai
Paani milta hai tere naam pe jab bhi mazloom
Aag senay main, teri piyas laga deti hai
Dekh lo aa-ke yaha'n chehra-e-Haq-o-Batil
Karbala aaj bhi dunya ko sada deti hai
Dheeme hote hain kabhi gham ke jo sho'ale dil main
Be ridaai-e-Haram un ko hawa deti hai
Ek behan, bhai ke maatam ko bulati hai humain
Aik maadar hamain shirkat pe dua deti hai
Gham-e-Sarwar ka dia jalta hai dil main jo Adeel
Us ki Lou, Fatima ki aah bardha deti hai
Naseeb wale hain bas Karbala ke daaman main
Jo Badnaseeb hain woh hain fana ke daaman main
Nahin ajab, ke pohanch jaae arsh tak foran
Jo Panjetan ko sajaao dua ke daaman main
Hussain Noor-e-Azal, Sham'a-e-Jawedaani hai
Kaha'n ye roshni toori fiza ke daaman main
Jinho'n ne sajde ko me'araaj ki ata Khoo'n se
Base hain loug woh Khaak-e-Shifa ke daaman main
Jinho ne tashnagi, Aab-e-Hayat main badli
Base hain log woh Khaak-e-Shifa ke daaman main
Hayaat de gae ®Abbas-e-Bawafa us ko
Wa-garna rakha hi kia tha wafa ke daaman main
Zabaa'n ki taigh se Zainab ne waar karne ko
Ajab saja diye Khutbe nawa ke daaman main
Jalane aae jo khaime unhain khabar hi nahin
Nehaa'n hain Zenatain Zain ul Aba ke daaman main
Tamaam jabr-o-tashaddud se tum ne kaam lia
Na chhora zalimo'n kuchh bhi jafa ke daaman main
Balaae Talti hain, hoti hain mushkilain aasa'n
Raho jo ulfat-e-mushkil ®kusha ke daaman main
Adeel kaash Khuda bhej de qalam ki taraf
Kayal jitne hain Maddah-o-Sana ke daaman main
Huwa zamana hamain intezaar karte huwe
Jo hai Hijaab main, ab to woh be Hijaab aae
Adeel ki hai yahi arz ae Imam-e-Zama'n
'Ye ho gaya hai zaroori ke Inqelaab aae'
Jitnay bhi log hain es jashan main aane wale
Sub teri raah main hain sar ko katane waale
Dee'n Adeel izn agar hum ko Imam-e-Doraa'n
Dekhain phir himmatain apni, ye zamane waale
Us ka hai intezaar ke dekha nahin jisay
Hai us pa a'etebaar ke dekha nahin jisay
Hairat hai kiyu'n Adeel, ke es kaaenaat par
Us ka hai iqtedaar, ke dekha nahin jisay
Sukoon qalb ko mil jaae gar ziyarat ho
Main be qaraar hoo'n kab se, Qaraar de mujh ko
Yaha'n bhi gulshan-e-Zehra ka phool khil jaae
Khiza'n rasida chaman main bahar de mujh ko
Mita doo'n zulm ko dunya se ae mere Khaliq
Ali ke ishq ki gar zulfiqar de mujh ko
Adeel ko bhi ata kar de oj-o-izz-o-sharaf
Banoo'n main Banda-e-Meesam woh dar de mujh ko
Aansoo
Gham ka koi bhi manzar
Roshni se Aankho'n ki
Dil se jab guzarta hai
Rooh tak pohanchta hai
Tab kahin pohanchti hai
Aankh tak nami dil ki
Jin ki Khush Aankho'n ko
Ye nami nahin Hasil
Dil Adeel kehta hai
In ke paas sub kuchh hai
Sirf hai kami dil ki
Ye Bargah-e-Shah-e-Shaheeda'n hai momino!
Qismat se is ka rakha gaya hai Ghadeer naam
Ye auj ye hasham bhi esay mil gaya Adeel
Mehfil main aarhai hain yaha'n baarhwen Imam
Sun zara tik tik ghari ki jis pa kuchh pehra nahin
Baat hai aasaan, Is main falsafa gehra nahin
Kehti hai ye sui ke narm ro qadmo'n ki chaap
Waqt achha ya bura ho aaj tak th'ehra nahin
Kia kahoo'n, hai kisqadar ulfat Dar-e-Abbas se
Ye dua hai, bas rahe qurbat Dar-e-Abbas se
Kiyou na phir Shabbir ke dar tak rasaai ho Adeel
Es dua ko jab ko hai nisbat Dar-e-Abbas se
Dosto azmat ko samjho tau Dar-e-Abbas ki
Tum zara dehleez choolo tau Dar-e-Abbas ki
Tum ko barh kar khud dar-e-firdos choome ga Ad®eel
Chashm-e-Dil se khaak choomo to Dar-e-Abbas ki
Raasta kitni duaao'n ka Dar-e-Abbas hai
Khaatma saari balaao'n ka Dar-e-Abbas hai
De raha hai parcham-e-®Abbas ye muzhda, Adeel
Karbala main dar wafaao'n ka Dar-e-Abbas hai
Darsgah-e-Ishq ka mehwar Dar-e-Abbas hai
Mannato'n ka Haajato'n ka dar, Dar-e-Abbas hai
Karbala main hai Dar-e-Shabbir, Baab-e-Mustafa
Es hawale se Dar-e-Haider, Dar-e-Abbas hai
Jazba-o-joush-e-wafaadari ka jal Abbas hai
Khaali mashk-e-Zeest ke bharne ka hal Abbas hai
Jis main kul sadyaa'n simat aaeen sar-e-nehr-e-furaat
Aisi sa'at, aisa lamha, aisa pal Abbas hai
Saare Dar Firdous ke khul jainge tum par Adeel
Tum zara choolo tau chokhat ko Dar-e-Abbas ki
Dekha jo Aks-e-Mashk-e-®Sakina Furaat main
Tashna Labi badal gai Aab-e-Hayat main
20 th October, 2008
Copyright © Adeelzaidi.com | All Rights Reserved